Nawad-an ug Iring!



Salamat kang  Mr. Google sa hulagway

Nagtan-aw ug TV akong bana sa sala samtang ako nia sa computer sa dihang nitingog ang doorbell. Ding dong! Ding dong! Alas 8:25 sa gabii na pagtan-aw nako sa oras nga naa sa computer. Sa akong huna-huna "Kinsa man intawoy moanhi sa among balay aning orasa?" Nihunong ko kadali tapos nadungog nako akong bana nipaingon sa akong nahimutangan, nihangyo nga ako ra daw abri sa pultahan kay naka boxer ra siya kay padulong na man matulog. Nisilib sa ko sa bintana, babae nga naa sa mid 50s siguro ang edad maoy akong nakita, abi gani nako ug si Brenda. Putos iyang lawas ug winter clothes pati iyang ulo kay grabe gyud katugnaw sa gawas.

 Pag-abri nako ingon niya, "Hi, I'm looking for my cat. I thought I heard a meow in your garage, do you mind if you check  your garage for me?" Iyang  panagway ug tingog mora siya ug nawad-an ug anak, dili iring. Akong tubag, "Just  a second, I will go check it for you", ug sa kusina ko niagi ug akong gipasiga ang garahe, pirtiiing tugnawa gyud, grabe. Akong giabrihan ang garahe aron akong ipakita sa iya nga walay iring, pero nakadungog ko ug meow. "Hala, morag naa gyud diay", sa akong huna-huna. Nadungog pod diay to sa babaye, ingon niya, "I think she's at the back!" Excited kaayo iyang tingog, dali2x siya paingon sa likod. Ako dayon gipasiga ang suga sa likod. Ingon ko, "Please be careful!" kay naay snow didto nga nituskig na sa katugnaw, danlog na mao delikado kung dili magcareful pagtamak kay ma-slide gyud.

Pag-abri nako sa pultahan sa likod, naa gyuy iring! Itom ang color, grabeng dagan while ang babaye sige ug tawag sa pangalan sa iring pero natingala ko kay ang iring wala gyud naminaw sa iya. Sige pod ko ug tudlo, "she's running over there!" ambot kung babae ba kaha tung iringa, hehehe!

Pagkakita sa babaye, ingon niya, "No, that cat is black. Mine is white. Her name is Diamond". Naluoy gyud ko sa ugis kay nagkurog2x na gyud siya sa katugnaw kay kinatugnawan gyud kaayo, hasta ako nagkurog2x na pod. Nagpadayon siya ug lakaw didto sa among koral sige tawag, "Diamond... Diamond... please come home baby..." Nisulod na lang ko kay di na maantus ang katugnaw, ako lang siya gisilib sa bintana hangtud nga nibalik na lang siya sa iyang agi. Wala gyud niya nakita ang iyang iring. Diri ra ba gyud sa US kay part na sa ilang family ang pet like iro ug iring. Maayo unta ug nakita na to sa babaye ang iyang iring kay aron dili na siya maexpose sa katugnaw sa gawas. Intawon pod. Tsk tsk tsk!

Mao na lang sa to. Mohigda na ko kay kining akong ugis pod dili matulog kung di taparan, magliraw2x pa ang mata sa TV, dapat matulog na siya kay 2am momata na na gyud siya kay day-shift siya karon. Pagmohagok na, hinay2x dayon ko ug bangon kay motan-aw pa ug sa Dulo ng Walang Hanggan ug ang Chief Justice on Trial, hehehe!

Babush!