Beef Adobo: Ang Bag-o nga Paborito ni Ricardo

Di ba dili man ni uso sa ato nga mag adobo ug beef? Kay ako gyud personally, basta karneng baka gani akong paliton, ako jud na i-nilaga, wala man gani ko naka try ug luto ug bistek tagalog kay mahal baya ang karneng baka. Sagol bukog man gyud ang akong paliton gyud kay barato unya lami ang sabaw kung naay bukog2x.

Kining si Ricardo hilig kaayo ug beef, gusto niya nga mag adobo ko, nagpalingog-lingog lang ko kay morag wala man gyud ko nakadungog nga naay beef adobo. Hangtud nakulitan na ko niya mao nga akong gisearch sa internet, naa man gyud diay recipe, hehehe! Ang pirmiro nako nga pagluto gisagulan nako ug gamay nga pepsi, sprite man unta to pero wala man koy sprite, kay para mahumok gyud siya ug maayo.

Birthday ni Ricardo tong petsa 14 ani nga bulan unya mao ni iyang hangyo sa ako nga lutuon. Ako siya giingnan nga hugasan sa niya ang plato ug hinluan ang kusina kay aron magluto ko. Messy kaayo among kusina kay nagluto ko ug cassava cake ug naghimo ko ug mango float mao gitapulan ko ug panghinlo. Pirting suguta pod sa ugis, hehehe! Pagkaugma pa gyud nako naluto kay ako sa siya gipahulat2x, my bad, hehehe!

Beef Adobo

Mao ni ang pamaagi sa akong pagluto. Wala na nako butangi ug pepsi.

Butangan ug salt and pepper ang karne unya ipabrown sa gamay ra gyud kaayo nga oil, mga 1-2 tablespoons.

Balihon dayon, ingon ana na ang dagway.

Mao ni ang lamas: tibuok nga paminta, dahon sa paminta ug 3 cloves ahos, then andam pod ug toyo gamay  mga 2 kutsara, ug suka mga 1/2 cup ug unya tubig pod gamay, mga 1 1/2 cups ug salt to taste.

Ibalhin ang karne sa medyo lawom nga pan with taklob, ibutang ang mga lamas, tubig, toyo ug asin. Pabukala unya tilawi kung okey na ba ang timpla. Kung ok na, pabukala na pod then ig magbukal na hinayan ang kalayo as in hinay kaayo hangtud nga mahumok na ang karne. Pagkahuman ibutang na dayon ang suka until medyo mag-oil2x na gyud ang sauce.

adobo with Jasmine rice

Abtik dayon kaayo nagpahukad si Ricardo unya iya dayon ni gisend ang photo sa akong daughter kay nagchat man sila, gipaibog dayon niya hehehe! Kung imong napansin, tinidor ang nakabutang dili kutsara, wala man guy uso ang kutsara ngari, tinidor ang gamit ig magkaon. Nangatawa mi ni Ricardo kay ingon sa akong dalaga, gimingaw na daw nuon siya sa among plato pagkakita niya, hahaha!

Mas lamian pa ko ani nga pagkaluto kaysa kadtong giluto nako nga naay pepsi nga gipost nako sa akong food blog, humok gyud kaayo gihapon basta hinayan lang gyud ang kalayo, dugay2x jud nimong hinulat nuon pero lami gyud ang resulta.

Mao na lang sa to.

Tsika na pod ta sa sunod.

Daghang salamat sa pakipag-kukabildo sa ako.