Kadtong Nabiyaan Ko Sa Eroplano Paingon sa Pinas Part 2

(Nabasa na ba nimo ang Part 1?)

Ug hapit nagisi ang akong baba sa kadako sa akong "HA????!!!" Nitindog ko aron masuta kung unsa nagdamgo ba ko, ang mga pipol nagbagulbol kuha sa ilang mga gamit sa overhead compartment. Niapil na lang pod ko sa panon.

Sa gawas ra mi sa gate naghinulat kanus-a maayo, haskang daghana namo walay kaingkuran, niingkod na lang mi sa salog gyud, gihatagan mig snacks sa United Airlines ug water pero akong gihagad si ate nga moadto sa duol nga kan-anan ug nagtsika mig maayo. 

Delay ug duha ka oras ug tunga. 

Naa na gyud mi sa eroplano ug naglupad na gyud sa kawanangan. Akong gitan-aw ang akong ticket..  dili na gyud nako maapas ang akong sakyan unta nga airplane gikan sa Narita paingon sa Manila. Tsk! Ug wala ko nasayop, pag-abot nako wala na ang airplane. Tungang gabii na mi naka land ug naglibog na ko sa oras ug sa petsa kay Japan na man lagi. Unya nanimaho na kog kangho kay isa ra ka underwear akong dala ug isa ka pair nga medyas kay tote ra man akong bitbit lagi pero naa koy balon nga panty liner. Pero bisag mag ilis kag panty liner lahi ra gyud kung bag-o ang ilis pod ang panty, haha! Igang! 

Nag bid goodbye na mi ni ate kay deretso na siyag Pinas from Narita. Pagkahuman sa Immigration niadto ko sa office sa United Airlines kay makigstorya na pod ko kung asa ko ani paingon. Pag introduced nako sa akong kaugalingon pina bow ang Japanese airline staff pina ingon, "Good evening Mrs. Garner! I have tickets for you!" Pagtan-aw nako, duha ka tickets nga libre paingon sa Guam ug paingon sa Pilipinas! Gitan-aw nako ang oras sa departure, naa pa koy duha ka oras. Nakaginhawa ko ug dako. Nag-asked ko ug help to track my luggage pero wala gyud nila natraced. Sa Pinas na lang daw ko magcheck kay basin nag una na didto.

Pagsakay nako para Guam nakaingon ko nga haaay.. kapait, imbis naa na ko sa Asia, mobalik na pod ko sa US Territory. Dili kaayo puno ang airplane. Ingon ko nga makatulog na gyud ko ani ug tarong kay naa na gyud koy ticket to Pinas, klaro na nga makauli na gyud ko. Unsaun pagkatulog nga duha ka baby naglumbaanay ug hilak! Gilingaw lingaw na sa mga flight attendants, puli2x silag hagwa kay gipangkapoy na ang mga inahan. Wala na nako gidugagan ang stress, ako na lang gi accept ang tanan ug nakaingon ko nga dili gyud malikayan nga naay mga kakulian gyud kay life is not fair baya.

 

Ang airport sa Guam medyo gamay ra ug walay libre nga wifi mao wala koy communication sa akong family sa US ug sa Pinas, labina sa kang Ivy, akong isa sa mga sisters nga maoy mosundo sa ako kauban niya akong BFF si Lalay. Ako na lang gilingaw2x akong kaugalingon, nagsuroy2x ko sulod sa airport mora gyud ug naa ra ko sa Pinas, hahaha! Tan-awa ang kabaw, bangka, baroto ug ang isda. Ang mga locals didto morag nawong ug Pilipino, morag Pilipinas ra gyud ang ambiance sa airport.

Hapsay kaayo ug walay delay ang akong flight gikan sa Guam to Manila ug Philippine Airlines akong gisakyan. Mga upat ka oras pod ang biyahe. Wala gyud ko nakatulog sa airplane. Akong huna2x, asa na kaha ang akong mga luggage?  

After sa Immigration, gigamit dayon nako ang free wifi sa NAIA pagsend ug message sa akong bana ug mga anak nga naka abot na gyud ko sa Manila, kaluoy sa Diyos! Nagmessage dayon ko kang Ivy nga palitan ko ug akong mga gamit kay wala gyud koy masuot unya niadto ko sa help desk sa PAL para makibalita sa akong mga gamit. Niana ang ground crew nga sa Davao na nako asikasuhon para makas-a ra daw. 

Nakig istorya dayon ko sa taga PAL pag abot nako sa airport sa Davao about sa akong luggage. Pagka hassle man diay mag file ug missing luggage, pastilan! Dili ra gud unta siguro pero kana ganing wala kay tulog, walay ligo ug walay ilis, mga 48 hours na, maka init sa ulo!  Kinahanglan nga akong idescribe ang akong mga suitcases: Unsay color? Unsay brand? Unsa kadagko? Naa bay timailhan like ribbon o luggage tag? Gitagaan kog papel unya gipasulat sa ako. Gikuha akong Passport, Driver's License ug boarding passes para ilang iphoto copy unya nag sign pa gyud ko ug authorization nga ako silang gi-authorize pagclaim sa akong luggage ig moabot na. Unya gikuha pod ang local celphone number nako kay para ila kong matawagan or ma update. 

Maayo na lang naa akong sundo pag gawas nako sa airport, weird kaayo kay handbag ra akong bitbit. Pag abot nako sa hotel, sa Marco Polo Davao ko nagstay, nagshower dayon ko, akong giingnan si Ivy ug Lalay nga pukawon ko pagka alas 6pm kay gusto ko magdinner sa Times Beach kay gusto ko mokaon ug seafoods. 

Dugay ko nila gipukaw kay nagduha2x sila ug pukaw nako kay ang ako daw hagok, klase2x ug tingog ug haskang kusuga, luoy daw ko pukawon, hahaha! Ug kami na lang ang last customer sa kan-anan nga among giadtuan kay grabe na ka late sa gabii, manirado na sila, hahaha!

Anyway, 2 ka adlaw pa nakong hinulat adisir ko nakadawat ug tawag sa PAL nga naa na ang akong luggage. Ug matud pa nila niabot daw sa Haneda, Japan akong luggage, hahahaha, kaluoy pod sa akong mga gamit morag way tag-iya! Kumpleto ang sulod sa luggage, walay nawala PERO ang akong isa ka suitcase nadamaged, dented kaayo so wala na nakabalik sa US. Wala na nako gikuhaan ug picture sa damage kay ang ako nga nalipay na lang ko nga nakuha ra nako ug wala nawala ang mga sulod.

Pabalik nako nga flight sa US medyo natrauma na ko, nagapangutana na ko sa akong tapad sa airplane gikan sa Davao kung naa ba silay connecting flight paingon sa US kay makigkuyog na lang ko, hahaha!  Ug nakaswerte ko nga naay niingon nga pa Los Angeles pod siya. Nalipay kaayo ko! Ug blessing sa Ginoo nga I gained a really nice friend that day, hangtud karon nagpabilin mi nga suod nga amigo.

Mao ra to. Daghang Salamat sa pagbasa aning taas nga post. Balik2x ha, ayaw kaulaw! :)

Sa sunod na pod natong pag Kukabildo.

Kadtong Nabiyaan ko sa Eroplano Paingon sa Pinas Part 1

Nahitabo ni June 2017. Hagbay na nahitabo pero klaro2x pa gamay (Lol!) sa akong panumduman. Akong ticket is from Las Vegas Via United Airlines to San Francisco CA to Davao City. Mogikan ang airplane 4pm kapin paingon sa San Francisco. Sayo kaayo ko sa Las Vegas kay aron dili magkara2x. Katulo or kaupat gyud giutro ang flight details tungod sa weather. Nagsugod na kog kakulba pag ingon nga 9 pm na kapin ang departure, ang biyahe is isa ka oras ug tunga to San Francisco unya akong flight to Pinas is midnight. Gibalhin ang mga naay connecting flights sa duol sa pultahan para daw dili kaayo malangan. 

Pag-landing pinaabtik gyud dayon ko sagol dagan. Sa kakulba naglibog ko kung asa nga tram akong sakyan paingon sa International Terminal, blue or red? Kining magpadala ta sa gibati dili gyud maayo, lisod magfunction ang utok, ang akong gihuna2x nga taas ra ba gyud ang linya pagcheck in sa PAL unya moagi pag Security then moadto pa sa gate. Morag nakafeel na ko nga dili na gyud ko makaapas. 

Pag-abot nako mingaw na ang PAL office, wala nay tawo nagtikaw2x... closed na. Kadto nga segundo feeling nako nakakita kog dako kaayo nga monster nga padulong sa ako kay lamyon ko or morag feeling nako naa ko sa dagat nag atubang unya naay morag simbahan kadako nga balod nagdagan paingon sa ako ug wala gyud ko nakalikay. Nablangko ko kadali. 

Wala ko kasabot sa akong gibati.. Gitawagan nako akong bana ug mga anak. Pirti nila kaguol. I tried to contact the number sa PAL nga naa didto sa office pero walay nitubag. Duha mi kabuok ang nabiyaan pero ang isa mao nga nabiyaan kay naglangay2x ra man taga California ra man unta, kumpiyansa ra kaayo so niuli na lang siya kay duol ra man ilang balay. Niingkod sa ko para makalma akong kaugalingon. Tungang gabii na ug gamay na lang ang mga tawo sa airport. Akong daughter nagsuggest to find a kababayan para mogaan akong gibati. 

Naglakaw2x ko ug naa koy nakita sa unahan nga medyo edaran na siya nga babaye, daghan siyay luggage nakabutang sa cart. Ako isa ra gyud ka tote bag ang akong bitbit kay para piskay ang biyahe walay hassle kay gichecked in nako ang uban. Ug nakadumdum ko, asa na kaha akong luggage karon? Naapas ba kaha pagtransfer sa PAL? Unya kay wala man ko nakasakay? Aguy.

Natayming nihangad si ate ug nitan-aw sa ako, ako dayon siyang giask, "Pilipina ka 'te?" Ingon niya, "Oo". Nag asked ko, "Naiwanan ka rin ba ng airplane te?" Ana siya, "Ay hindi, chance passenger ako being a beneficiary ng anak ko na nagtatrabaho sa Asiana Airlines at naghihintay lang akong tawagin ang name ko". Ako siyang giingnan nga ate sorry pero maayo unta dili ka tawagon te para naa koy kuyog. Nikatawa ra pod siya. Ug wala gyud siya gitawag! Salamat sa Ginoo!

 

Alauna na sa kadlawon, niana ko kang ate nga mangita mig hotel nga duol sa airport pero niana siya nga adto lang daw mi sa United Service Organization Office (USO) office nga naa sulod sa airport kay pwede daw mi makastay didto kay iyang late husband dati nga sundalo ug naa siyay beneficiary ID. Unya ingon ko nga ikaw na lang te kay basin dili ko pwede, wala pa man akong anak ato nagsulod sa Marine Corps. Niana siya testingan lang daw kung dili ko pwede mag-unong mi, adto na lang mi sa bench or wherever basta sa airport lang kay basin makalarga siya early pero need pa niya moadto sa Asiana Airlines office.

Layo2x ang USO office sa among nahimutangan so nagsakay na pod mi ug tram medyo gamay ra ang mga tawo kay dis oras na lagi. Nitud-an ra namo ang USO (Terminal 1) ug dili ko pwede makasulod kay need ug mga numbers, etc plus identification card nga beneficiary ko. Pero kay ang nagduty Pinoy man, retired Marine si Manong ug gisultihan ni ate nga kung dili ko makasulod, manghawa na lang mi. Pero niana si Manong, okay sige pumasok ka na rin, sagot na kita. Haskang lipaya namo ni ate! Ug very comfortable mi kay dagko kaayo ang mga recliners pili lang ka asa mopwesto ug naay food pod like crackers, muffins, etc ug drinks like coffee, tea ug water. Daghan pod mga uniformed soldiers sa sulod, tulog  kaayo sila apil si ate naghagok na. Ag ako? Nagliraw2x ra akong mga mata! Nagplano unsay maayo buhaton. Akong una nga plano magcall ko sa PAL, ikaduha moadto sa baggage claim kay basin tua ra akong mga luggage. Wala gyud ko nakatulog hangtud niabot ang 5am. Nangape mi, nagwashed up ug nagbulag na mi kay moadto siya sa Asiana Airlines ug ako moadto pod sa Baggage counter sa United Airlines. Nag thank you ko kang ate ug nigakos pinahugot. Nagbayloay mi ug phone number and said goodbye.

Nagcall ko sa PAL sa Pinas ug niingon ang agent nga I need to talk to the United Airlines Manager kay ilang sala nganong nabiyaan ko ug kung unsa man gani, naa pay duha ka bakante nga tickets nga available anang pagkagabii pero akong paliton. Nagdecide ko makigtalk usa sa United Airlines before ko mopalit. Niadto ko sa Domestic Terminal kay naa didto ang office sa United Airlines ug niadto ko sa baggage claim. Pagkasamok man diay gawas sa number sa imong luggage imo pa gyud idescribe thru writing ang imong luggage, like unsa ang brand unsa ang color ug kung naa bay tag, etc. unya busy kaayo sila. Nagtext si ate nga naa na gyud siyay flight finally pero going sa Narita, Japan ug United Airlines iyang airplane, kay pwede man daw na kay ang Asiana kuno ug United naay agreement sa mga ingon ana for employee beneficiaries. 

Nihawa ko sa baggage claim kay hinay ang progress ug nipaingon ko sa office, kadako sa ilang office gitudluan ko asa ang office sa Manager dugay ko nakatuod, pastilan. Akong gi introduced akong kaugalingon ug gihatag nako akong Driver's License ug akong giasoy ang mga panghitabo ug wala siyay pangutana2x nabusy lang siyag type abi nako gitype niya akong mga gipangsulti. Pagkahuman nako ug asoy nismile siya sa ako ug nipaingon sa printer ug gikuha ang iyang giprint ug giduhol sa ako. Akong gitan-aw, duha ka free airline tickets to Narita, Japan ang isa ug from Narita to Manila ang ikaduha! Grabe nako kalipay ug nagthank you ko sa iyaha, kahilakon ko pero akong gipugngan. Akong gibasa ang time sa departure, OMG, in less than an hour na ang boarding! Unya naa pa ko sa Terminal 1! Nihaguros gyud kog dagan para makasakay sa tram to Terminal 3, wala na koy pakialam kung hapit na ko magkadasmag2x, sure ko dili mahitsura akong dagway ato paninguha nga dili na pod mabiyaan kay dili gyud lalim! 

Nakaabot na gyud ko sa Security! Naglinya nako. Ug wala na ko mahiluna kay boarding time na. Gisungog2x gyud ko sa panahon, ang 3 katawo infront of me isa ka pamilya, bana ug asawa unya anak nga adult na. Kining si Manang daghay gipangbutang nga secret money sa iyang mga secret pockets unya kay dili baya na pwede, giyawyawan sa anak, niana ang security officer nga dali manang diri ta sa kilid kay kapkapan ka. Nalipay ko kay akoy nay sunod sus niana man ang anak nga it's okay daw no need nga ipakilid sila, gipakapkapan gyud siya sa babae nga agent in front of all the people. Nadugay na nuon kog samot. Grabe gyud akong ampo nga unta dili ko mabiyaan. 

Paghuman sa Security dagan na pod ko padulong sa gate, I remember duol ko sa gate 6 ug ang boarding gate sa United Airlines is gate 104. Ingon ana kalayo akong gidagan. Wala ko nakafeel ug hangos ato mga panahona, dagan lang gyud taman2x. Finally, nakaabot na gyud ko sa gate, I heard nga gitawag na akong pangalan. Pagduol nako sa counter didto na ko gihangos ug taman, gipangutana pa gani ko sa staff if I want water. Pagsulod nako sa airplane mostly naka ingkod na ang tanan. Ug guess what? Nakita nako si ate ug nangashocked ming duha! Naa siya sa akong likod mga ika 3 ka row. Akong gichecked akong phone to call my husband nga I made it, nakita nako nga nagmissed call si ate ug naa siyay text telling me her flight details. Wala gyud namo damha nga magkasakay mi!

Paghuman namog talk kadali sa akong bana ug mga anak, nisettle na ko sa akong seat, waiting na lang nga magclose na ang door sa airplane ug molupad na. Nagpasalamat ko sa Ginoo ug nag ampo nga unta safe ang flight ug wala nay laing kakulian. Makatulog na gyud ko ug tarong, sa akong hunahuna. Ug gipiyong nako akong mga mata.

Sa dihang nitingog ang Intercom. Madelay daw mi gamay kay nagchanged pa ug Crew. Naminaw lang ko, ingon ko sa akong hunahuna, okay lang. Wala nagdugay tuod, naa na ang new Crew. Nagkabusy na sila check sa mga compartments, making sure nga okay ang seats, closed ang windows, ug uban pa. 

Nitingog na pod ang Intercom. "We would like to inform everyone that the plane has  mechanical issues found during the inspection and everyone is requested to deplane. You will stay at the gate as this will be fixed in a timely manner.We apologized for the inconvenience".

Nisiga akong mga mata ug pinakalit!

Nagkita-kits with the Oclarits Diri sa US

 Gipaposing mi ani ni Harry (anak ni Larah) para makuhaan ug hulagway.

Samtang nagkaon. Si Riza ang nagpiktyur ani.

Niposing sa adisir mi nagbulag-bulag

Maayong adlaw o kaha gabii!

Wala na nako ni na-update akong binisaya nga blog  (sorry pero masagulan gyud nako ug eninglish gamay dili malikayan) ug karon nakahigayon na gyud ko or nahatagan na gyud nako ug higayon para ma-update.

Nalipay ko ug dako nga nagkita mi ni Larah Oclarit, diri sa US mao ako gyud gi-blog. Ako siyang classmate sa High School. Kung karaan mo nga taga San Franz, kaila gyud mo sa mga Oclarits. Family of Professionals ni sila, simple lang kaayo ug down to earth. Si Larah karon nagwork as Nurse diri sa US pero Doktora ni siya sa Pilipinas.

Naa siya sa Houston, Texas naka based ug hagbay ra gyud namong sabot nga magkita ug niadto na gyud ko sa Houston pero wala gyud mi nagkita kay nagbisita man ko sa akong anak ato ug gilaag man mi niya sa San Antonio, Texas.  Naay usa ka higayon nga nagkadungan mi ug uli sa Pilipinas pero wala gyud gihapon mi nagkita. Ug niaging duha ka tuig niadto sila sa Las Vegas, niadto pod ko pero wala gihapon mi nag kita. 

Finally, tung Lunes, September 2, 2019, nagkita ra gyud mi niya sa Las Vegas. Kuyog niya iyang bana ug duha ka anak, iyang igsoon nga si Ate Emy ug iyang bana nga si Nong Bobong nga bakasyunista gikan sa Pilipinas. Kuyog pod niya iyang ig-agaw nga si Gina Rufila ug iyang bana nga nakabased sa San Diego, California.

Nagsabot mi magkita sa usa ka kan-anan sa Tuscany Hotel and Casino para mamahaw, bisaya ra gud nga kan-anan pero didto nako gidala kay duol ra sa airport ug naa didtoy server nga Pilipina, Riza iyang pangalan, nga grabe ka komedyante. Makabutod ug tiyan kay magsige ra man kag katawa niya. Ug tuod pirting lingawa gyud nila Larah! Ang nakakataw-anan pa gyud kay  si Jun, (ang bana ni Larah) ug si Riza, naay mutual friends sa Pinas! Kay taga Malaybalay, Bukidnon man diay si Jun ug si Riza naay balay pod didto. Ang nahitabo, naghinubay sila sa ilang mga kaila ug kami nagsige ra gyud ug pangatawa sa ilang mga sugilanon. Gamay ra gyud ang kalibutan!

Mga duha ra pod mi ka oras ug tsika2x kay paadto na man sila sa airport pagkahuman ug pamahaw pero grabe gyud nako kalipay nga nakakita ug taga ato, dili mabayran ug dollars ang feeling. Unya nadugangan akong friend's list kay gi-add dayon nako si Gina sa FB. Hopefully, makalaag mi sa San Diego in the near future para magkita na pod mi dala suroy.

Mao ra to. Ako lang gishare akong kalipay.

Salamat sa paghapit. Balik-balik pod, ayaw kaulaw.

Gusto Ka Ba Makabana ug Foreigner?

Hinulam ra nako ni nga pic kang Mr. Google. Credit to the owner.

Pssst... Mga dalaga o mga "dala na" nga gusto makabunal ehe, makabana ug "foreigner" matud pa, dali magkukabildo ta!
 

Kadtong wala nakaila sa ako, taga Agusan del Sur ko ug nia na ko nagpuyo sa US kay nakabana ko ug kano. Pirmi gyud ko nagapasalamat sa Ginoo kay gihatagan ko niya ug buotan nga bana ug mapinanggaon nga stepfather sa akong duha ka mga anak. Asa nako siya nadasmagan? Online dating site.
 

Naaghat ko pagsulat mahitungod ani kay ubay-ubay na pod nga akong mga amiga ug kaila nga "nangayo" ug kano. Kung sayon lang gyud "manghatag" nganong dili gud pero gilisdan gyud ko. Nakasabot ko nga ang pagtuo sa kadaghanan nga sayon ra mangita ug kano para ipa- ila ila sa mga kahigalaan kay ingon ana pod akong pagtuo tung una pero sayop kaayo ni nga pagtuo.

Una, ang mga kano nga akong kaila ngari nga gusto makig ila2x ug Pinay naay requirements sa babaye nga gusto nila maila-ila, like gusto nila nga single walay anak or single isa ang anak. Naglisod ko kay akong mga amiga ug kaila nga gusto ug kano puro naay mga anak ug kasagaran bulag sa bana ug nagkinahanglan ug annulment. Of course naay lalaki nga mogasto gyud, pareho sa akong bana, sa bana sa akong mga kaila nga sila Rowena, Almira, Nathalie ug Marilyn nga nigasto gyud. Pero kasagaran mas gusto nila nga walay hassle. Based na sa akong naobserbahan diri ha, sa lugar nga akong gipuy-an.
 

Ikaduha, kasagaran sa mga Pinay nga single pod, walay anak, gusto nga magka-anak ug tisoy, siyempre. Pero kasagaran diri kano naa nay anak ug dili na gusto nga magka anak pa. Naa gyud koy kaila nga nagbulag gyud sila kay ang lalaki dili gusto magka anak unya ang babaye gusto gyud so wala gyud sila nipadayon bisag dako na kaayo ang ilang nainvest, financially sa part sa kano ug emotionally sa part sa babaye.
 

Ikatulo, tungod sa teknolohiya karon, kinadaghanan nay kapilian ang mga foreigners so padiskartihay gyud ang labanan. Dili pareho tung una nga penpal2x pa ang uso, lisod ang communication, mao morag walay choice ang mga ugis. Karon, sayon ra kaayo sila makakita ug babaye, bisag pila pa kabuok ang gusto. Ni-evolved na ang online dating karon kay sa akong panahon daghan pa man loyal nga chatmate. Karon maruri na pod ning mga foreigners kay igmobisita sa Phillipines, tag duha or tagtulo ka babaye ang pakigkitaan, pilian kung kinsa ang maayo. Pwede pod na nga daghan tay pilian pero kanang dili pa sila makagasto, kay ingnun ta tulo kabuok imong kachat unya pulos nagpadala na ug kwarta, magabaan pod ta. Pero ayaw pod mo pailad ha, daghan kaayo mangilaray sa internet, morag makatuo gyud ka pero dili diay tinuod, morag kita gud pod nga mangatik pod aron makabingwit, hehehehe, pero seriously, daghan kaayo bastos ug walay batasan, idelete lang sila, i-blocked ug move on, ana lang. Ayaw usiki imong oras ug kwarta sa tawo nga walay hinungdan.
 

Ika-upat, gawas sa padiskartihay, paswertihay pod gihapon ug labina ang blessing pod ni Lord. Mao ato pod sagulan ug ampo ang atong diskarte ug dapat maghimo pod ta ug maayo sa atong isigkatawo para good karma, matud pa sa forum nga akong nabasa.
 

Mangutana mo, unsa may maayong buhaton? Akong mga suggestions:
 

MAGKUGI (caps locked para intense) ug paregister sa online dating sites, free na kasagaran sa mga girls. Ayaw pang add ug bisan kinsa sa Facebook or mangita ug kachat sa Yahoo chatroom (uso pa ba kaha ning chatroom karon?) Tulo ka dating sites akong giregisteran tung una: AsianEuro, Filipinaheart (morag lain na ang name ani karon) ug Mate1. Ug siyempre, butangan ug picture, kanang disente ka tan-awon. Akong gisuot sa profile pic nako tung una kay polo shirt.
 

MAGHIMO ug tinuod nga profile, dili maghimo2x lang, hatagan ni ug gibug-aton kay mao ni ang basehan sa mga guys sa pagpili nimo. Sa pangalan pwede ra ang nickname, pero ang edad isulti, work kung naay work, kung naay anak, iapil pod ug kung pila kabuok. Dili angay itago ang atong mga baktin kay luoy pod kung ilimod. Kadumdum ko akong gibutang tung-una "I am looking for a responsible man who is willing to accept and love my two kids. Also, he must be emotionally and financially stable." Daghan foreigners nga gusto ug babaye nga walay anak pero daghan pod sila nga okey ra kung naay anak. Atong hinumduman nga daghan kaayo isda sa dagat, so ayaw dayon ka disheartened kung walay mosend ug interest sa imo. Naay sulbad ana.
 

TABANGI IMONG KAUGALINGON. I-check imong profile regularly, kada online nimo, singit gyud sa imong yahoomail or gmail account. Ayaw pareho sa ako karon nga Facebook ang unahon, hehehe!Ug ayaw dayon ka dismaya kung walay nisend ug interest. Ang imong buhaton, magsearch2x pod ka ug mga guys sa site, basaha ilang profiles, ug kung na-swak sa imong gusto sa isa ka lalaki, padalhi ug interest or i-like iyang pic, or send him a message. Ana man gyud na, dili ta maghulat sa ilalom sa punuan sa mangga nga naay bunga ug maghulat nga mahulog sa atong baba, di ba? Paningkamot dala paninguha gyud atong peg, kay gusto man kaha ta nga makabana ug ugis, maka haw-as sa atong kalisod ug makatabang sa atong pamilya. Kung wala pa gyud gihapon, i-review imong profile kay basin ug naay kulang. Ug ayaw ug quit kay quitter never wins gyud. I am sure naa gyuy someone para nimo, sa kadaghan ugis sa internet, makahibalag ra gyud ka.
 

Ug hinumdumi nga dili basta-basta makakita dayon ug tarong nga lalaki. Kung makakita gani, dili lang kaayo pahalata dayon. Pa-effect2x sa, hahaha, Naay kaila ang akong bana nakakita ug kachat sa dating site, iyang giforward ang conversation sa Pinay, intawon ang Pinay na inlove man dayon bisag kaisa ka beses pa sila nagchat, niingon na dayon nga " I love you please bring me there, I will wash your clothes, will cook food for you and I will take care of you." Nahadlok ang kano, niatras kay nganong gidali2x daw siya wala pa gani sila nagka ilhanay gyud. Nakuyawan ug niundang na dayon siya ug chat sa babaye bisag nakagusto unta siya. Nangita siya ug kadtong medyo conservative kunuhay.
 

Kadumdum ko, tung nagchat2x pa mi aning akong bana tung una, pina ingon siya, "Do you want to come to the United States? Sus, ang akong huna-huna ka ingnunon na gyud ug "YES!" Pero, akong tubag, "That's almost everyone's dream. But it is not easy to come to your country and if ever I get a chance, I would like to take my kids with me". Wala sa ko nagpakita ug excitement dayon kay basin ug maulawan akong beauty ug siyempre akong giapil ug mention akong mga duga, ehe, mga anak kay para kung intresado siya sa ako, dapat kahibalo na siya nga apil gyud akong mga anak sa plano. Kung kamo dili ninyo iapil inyong mga anak, ok ra pod, inyo ng desisyon pero in my case, ako gyud sila giapil.
 

Daghan pa unta koy itype pero taas2x na ni nga post basin ug mabored lang mo. Basin naay Part 2. Kung naa moy pangutana, leave a comment lang ha?
 

Daghang Salamat, sa sunod na pod nato nga kukabildo.
 

Maayong adlaw!

First Time Nako sa Spa, Korean Spa Pa Gyud!

Niadto mi sa Los Angeles, California tung weekend kay nitan-aw ug NBA akong maidlot nga bana ug ang akong payatot nga dalaga sa Lakers vs. Warriors nga dula. Wala ko niapil kay dili ko fan ni Kobe nga maoy gikabuangan sa akong dalaga, sayangan lang ang bayad nga pirting mahala ra ba gyud, as in.

Dili ko gusto mabored while nag tan-aw sila so nagsearch2x kunuhay ko online kung unsay naa sa duol sa hotel. Nangita ko ug hair salon naa koy nakita pero wala pa ko nakadecide unsa nga hairstyle akong gusto kay plano nako nga magpa highlights ug gray kay akong buhok puno na gyud ug silver linings. Nakahuna-huna ko nga magpa massage na lang siguro kay naglisod na ko ug tulog, stressed out sa work schedule, etc. Pero plano pod nako magpafacial ug magpa wax or thread sa akong kilay so nahaabot ko sa site sa Spa. Akong nabasahan ning isa ka spa nga affordable ra ug okey kaayo ang rating. Nagpabooked ko. Pinakamahal kunuhay akong gipili nga naay body scrub, masahe ug facial, kibali upat akong gipabooked gyud, apil gel manicure. Igo pod mahuman ang dula, mahuman pod ko. Affordable ra gyud kay ang akong total sa upat nga bookings wala ra nakatunga sa worth sa tiket nila per person, ingon ana kamahal ang tiket sa basketball.

Alas 10:30 sa buntag andam na ko kay dapat kuno 45 minutes naa na ko didto para maenjoy gyud nako ang humol2x kuno. So nagsuot ko sa akong swim suit nga karaan, nagpalit ko ug 3 ka klase nga swimsuit online para ani nga "event" kunuhay pero it turned out nga guot ang tulo, harharhar, ambisyosang palaka ra akong peg, abi nako maigo pa ang medium, dili na man diay. Nagsuot ko ug maxi dress over my 2-pc swim suit ug gamit ang crocs sandals with bag nga dako puno kay naay tsinelas, towel ug robe. Nag-andam lagi, hehehe!

Nagtaxi ko kay aron dili mahassle akong bana nga nagkabusy na pod para sa ilang lakaw, ang driver kay morag intsik pero nagkasinabot man pod mi. Nag GPS ko sa akong phone aron gyud ma sure nga dili ko dalhon sa laing lugar hahaha, so akong nawong naa ra gyud sa akong phone, hangtud niabot mi.

Ang misugat sa ako kay dagko kaayo nga washing machines sa atubangan gyud sa spa, naay babaye nga naglaba, sa akong huna-huna, oops, morag lahi ra ni nga lugar ba.  Pagsulod nako, ok man diay, hinlo, unya daghan pod clients. Bayad daan so nag checked in ko, ingon ko nga first time nako, i-tour kuno ko. Gihatagan ko ug key nga gibutang sa morag spring  nga maigo sa kamot, morag pulseras. Ang una, gitudluan ko sa akong locker sa sapatos ug ang sunod ang locker sa bag. Naay sulod ang locker; robe nga nipis, green ang color ug towel nga magulang lang sa good morning towel nato sa Pinas.

Tungod sa pagpugos nako sa pagsulod sa akong bag sa locker, didto ra gyud akong atensyon. Sa dihang nahiluna na nako ang akong gamit, paglingi nako sa palibot pirti nako kashocked! Ang mga babaye nga naa sa akong palibot naglakaw2x walay sinina! As in hubo gyud kaayo! Morag kakuyapon ko!! Kay meaning maghubo pod ko?! Dili pwede magswim suit?! Pwede mo-atras?! Pagkadakong binuang ni nga kahimtanga! Mao na ang nisulod sa akong huna-huna! Unsaun na lang?! Ayayay!

Hinulam ra nako ni nga photo. Credit to http://www.vogue.com. 

Nagpa aron ingnun lang ko nga wala ko nalisang, naniid-niid sa palibot. Naay babaye nanothbrush, giputos iyang buok sa towel pero hubo siya, ang iyang duha ka dughan naglabyog-labyog kada lihok sa toothbrush, hehehe; naay babaye bag-o lang niabot naghukas deretso, anad na siguro, sa akong huna-huna. Klase2x ang naa didto, naay puti, intsik, itom, naay batan-on, edaran ug tigulang na gyud as in yukog na gud ang agi, tulo sila kabuok, magbarkaa guro hinay kaayo sila nilakaw, wala pod silay sinina. Naay intsik ug nawong nga edaran nga babaye naglakaw2x nagsuot us itom nga bra ug itom nga panty nga high waisted, kanang pang manang nga panty ba, hehehe! Mga mokabat ug more or less 50 ka babaye ang naa didto. Basta nakita nako ang klase2x nga porma sa lawas, klase2x nga porma sa atubangan ug sa mga sampot! Naay walay balahibo, naay baga-baga, naay nagkatag ang agi, basta, klase2x!

Magshower sa daw kuno before mohumol ingon sa nag tour nako. Ang shower nga transparent ang division naglinya pulos walay pultahan hahaha, unya naay nangaligo didto. Normal ra kaayo sila nga nangaligo, morag wala lang. Sa wala nako nga bahin naay lingin nga morag pool, gamay lang siya mga 7 or 8 ra guro ang pwede makahumol didto, lain ug color ang tubig morag olive green sa akong panan-aw, naay naghumol2x didto.  Naay kwarto nga nag-aso2x, dry sauna kuno to, gitudlo pod sa ako ang himalayan salt bath, unya naay pool pod nga square, very cold water kuno ang naa didto unya sa pikas naay jacuzzi nga regular lang daw ang kabugnawon. Sa kilid sa mga pools, naay morag mga gagmay nga  kwarto makita kung kinsa ang naa sa sulod, nakita nako ang babaye nga gahigda sa massage table, nagkulob, walay tabon iyang lawas, samtang gimasahe sa babaye nga nagsuot ug bra ug manang nga panty, mao diay toy masahista. Didto sa tunga naay babaye nag inusara, nagkabusy ug kus-kos sa iyang mga tuhod, walay sinina. Sa tuo nga bahin naay mga babaye nga ang uban nagsuot ug robe, ang uban walay gisuot naghidga2x sila, infra red corner kuno to. Naay nagbasa2x ug magazine ug libro, bawal man ang celphone didto.

Gisuroy ko sa unahan, naa didto ang kitchen, ug didto daghan pod mga babaye didto nagkaon, nagcheck sa ilang email, naay nagdula sa ilang gadgets, naay nagkabusy ug text, while nagkaon. Ang uban nagsinina na, ang uban nagsuot lang ug towel o kaha robe. Didto nako narealized nga Korean Spa to kay ang ilang mga pagkaon sa kitchen kay Koreano man. Kung mag order ka, i-scan lang nila ang number sa key nga naa sa kamot ug deretso na na sa imong credit card. Gisuroy pod ko sa facial room ug manicure room, etc. 

Ang akong 45minutes para maghumol nakuhaan na ug 25 minutes tungod sa tour ug sa akong paglangan-langan.  Dili gyud ko kahubuon uy, daghan koy pasumangil sa akong kaugalingon, adto ko sa akong locker, naniid-niid. Ang mga pipol kay walay pakialam, mind your own business ang peg ba. Sa pagpaniid nako, morag wala man gani naka pansin sa akong presensya, sa akong huna-huna dapat makahumol na ko para mahumok ang akong panit ug ang mga buling nga nagkapyot. Sa akong huna-huna, ah wala bitaw nakaila nako ngari! Ug arang-arang na lang pod ko kay wala koy bilbil!(Sukad man gud nako nagwork ko with wierd schedule nipayat gyud ko kaayo) Hinay-hinay na ko ug hukas sa akong sinina ug swim suit, maayo na lang naka partial shave ko or trim ba, morag dili ra ngil-ad tan-awon akong atubangan, hahaha, kaulaw lagi! Pero sa akong huna-huna, ah kinsa pod uroy ko nga ilang tan-awon ug tutukan!

Gisuot nako ang robe ug tsinelas, nipaingon sa shower ug maayo na lang nga naay butanganan sa towel ug robe (nga naay numero sa locker) didto dapit sa shower ug humulanan. Niadto na ko sa kadtong lingin nga pool kadtong lain ug color ang tubig, maayo kay dili kaayo ko klaro hehehe, naay mga upat ka babaye didto, mga edaran na ang tulo, ang isa mga naa sa late 20s pa guro. Pirting inita ang tubig!Giingnan ko sa batan-on nga ipungos daw akong buhok ug pwede gamiton ang morag pulseras nga butangan sa key, sosyal man nga key kay1 inch ra ka taas ug plastic siya naa lay barcode. Medyo naokey ko kay friendly man siya. Okey pod ang mga wanggitz, nismile man sa ako so nag tabi na ko ug sugod. Ako silang giingnan nga first time nako, ingon tong isa nga kada bulan daw siya gaanhi, ingon pod ang batan-on nga siya pod, mao daw na ilang ritual. Nag ask sila kung unsa akong treatment, niingon ko nga Goddess pulos sila na amazed kay it is the best daw, ug mas na amazed sila pagkabalo nila nga si Hong akong gipili kay mao pod daw na ilang masahista. Ingon ko nga nabasahan nako sa Google nga maayo siya. Ilang gitudlo kung kinsa siya, kadto diayng babaye nga akong nakita nga naglakaw wearing black bra ug panty. Swerti daw kuno ko kay siya akong gipili. Nalipay ko.

Niingon tung batan-on nga dapat ako daw sudlon ang tanan nga rooms para sulit ang bayad, kadtong dry sauna, himalayan salt ug unsa pa tong uban, hasta kuno maayo magtabok2x sa very cold unya balik sa hot unya cold na pod while waiting sa time. Gamay na lang akong oras, on time ra ba gyud daw sila, so akong gibuhat nitabok  ko sa very cold nga pool, grabe katugnaw gyud! Mas maayo pa ang init mao mga 5 ka minutos lang ko didto, nitindog ko kay mobalik na sa hot. Mora ko ug nalipong! Naghinay hinay ko ug lakaw, paingon sa de kolor nga pool, naa pa didto ang isa ka babaye nga naistorya nako, ako siyang giingnan nga mora kog nalipong. Ingon niya nga nabag-ohan lang daw ko, normal lang daw na, inom ug tubig daw unya irelax ang lawas, mag hinay2x lang daw ug lakaw. Nakaginhawa ko ug lawom nga normal reaction ra diay, kay simbako uroy ug makuyapan ko, unya naghukas baya, nah, kadakong impas! 

Niingon ang babaye naa daw one time nga nawitnessed gyud daw niya, naay babaye naligo sa shower nalipong daw ug nabunggo iyang ulo, nakita gyud daw niya ang dugo nipugsit, niabot daw ang ambulance, sila tanan gipangtapok sa corner, gitudlo niya asa dapita, mora daw sila ug sardinas unya mga hubo gud sila tanan! Aguy! Naimagine nako ilang kahimtang ato!

Gitawag na akong number, naglisod pa ko ug sabot kay abi nako 44 ang iyang ingon, 42 diay, ang akong number. Dako kaayo ang smile ni Hong. Ako siyang giingnan nga, "I heard you are the best that's why I chose you" dako pod akong smile. Ingon siya ug "Thank you" nga morag naulaw. Gipahigda ko sa tama-tama ra pod nga massage table, naay towel nga baga, face down. Sa akong huna-huna, "maayo unta ug dili ni kaklaro iyang mata ug tan-aw pareho nako para dili niya maklaro ang mga di maihap nga peklat ug stretch marks, hehehe! Gibanlawan ko ug morag isa ka balde nga tubig nga very smooth kaayo unya warm. Nindot na dayon kaayo ikatulog uy! Gisugdan na ko ug scrub, nus-nos didto, nus-nos diri, as in tibuok lawas gyud, iyang gamit kay korean nga morag gloves gani nga morag towel pero rough gamay. Pagkalami sa akong pamati!

Sa akong huna-huna, dako gyud akong itip ni Manay kay tiaw bay grabe gyud niyang kus-kos intawon! Daghan pa siyay gipangbutang morag lotion, unya kadtong tubig na pod nga smooth, unya nus-nos na pod, nakatulog ko unya namat-an nako nga ganus-nos pa japun siya, hehehe, kugihan kaayo.  Unya gipashower ko. Pagpaso nako paingon sa shower room morag wala na ko na self-concious kay wala lagi pakialam ang mga pipol didto. Pagbalik nako iyang gihinluan akong nawong ug naa siyay gibutang nga morag mask nga morag cucumber guro to ug naa pod siyay gihidhid sa akong tibuok lawas unya gimasahe akong likod, abaga, liog, ulo mga kamot ug uban pa nga parti sa lawas, nakatulog na pod ko. Pagmata nako iyang gimasahe akong scalp unya gishampoohan akong buhok unya iyang giputos ug towel unya pagtindog nako iya pa gyud ko gisuotan ug robe ug gihatagan ko ug tsinelas. Nahuman na ang1 ka oras ug 45 minutos. Naa siyay gihatag nako nga gamatitoy nga brown envelope, akong nasabtan nga butanganan to sa tip ug naa akong number nakasulat. Nalipay gyud to siya sa akong tip, sure ko.

Nagpaabot ko sa akong sunod nga appointment nga gel manicure.Wala ko kabalo unsa ng gel manicure. nag ingkod2x ko sa ilang nice nga waiting area hangtud nga gitawag na ang akong number. Koreana pod ang manikurista. Ingon niya unahon sa namo ang waxing sa kilay ug sa akong upper lip. Gipahigda ko sa morag massage table pod, dali ra kaayo nahuman morag gikilatan ra. Oras na sa gel manicure. Kagi, abi nako unsa ng gel manicure, kana ra man diayng ordinary nga manicure, ang nail polish kay kana ra gung normal, ihid-hid ra sa kuko, hahaha! Abi pod nako ug unsa! Kini laging low maintenance ra ta kaayo, walay uso ang manicure sa ako. The last time nga nagpanicure ko kadtong niuli ko sa Pilipinas, tung niaging tuig!

Red akong gipili nga color kay good luck daw, hahaha, bisaya kaayo nga pinilian! Wala ko nalipay sa manicurista kay gidali2x ra ang pag manicure, morag gikilatan ra pod. Wala man gud kaayo cuticle kay wala man naanad akong mga kuko so wala nay langan plus gagmay ug mubo kaayo akong mga kuko, mga 15 minutos human na ang kanahan. Pirti gyud, gilamo-lamo ra. Nauga na pod dayon kay gisulod man akong kamot sa morag heater. Wala ko nalipay, pangit kaayo akong mga kuko pagkahuman, kana ganing wala man lang nag effort nga medyo maporma pod, way klaro lagi. Pina abtik pa siya ug hatag sa envelope. Nagthank you gihapon ko bisag pungot. Gamay ra akong gi-tip niya kay dili siya deserving.

Anyway, igo gyud pod ko nahuman, nagtext akong bana nga maidlot nga nakadaug daw ang Lakers nga morag nashocked pa ko nga nakadaug nga Warriors gud ang kalaban, hahaha, sige baya sila kapildi! Lipay daw among dalaga which is good kay sulit ang gasto.

Nagpatawag ko ug Taxi sa front desk pabalik sa hotel, ug ang driver kay intsik looking na pod, tabian, medyo guwangon na. Koreano diay siya. Ug sa dihang nagdagan na ang taxi, nag tan-aw2x ko sa palibot, nganong dili man ko kabasa sa mga signs sa buildings? Nakaingon gud ko nga wala ko sa LA or US  kay pulos inintsik ang nakasulat gyud, promise! Nakatawa ang driver, naa daw mi sa Korea town! Ingon ko, mao? Abi nako China town lang naa! Hahahaha! Pirti nakong katawa kay bantug ra kadtong driver nga nihatod nako morag intsik, koreano diay pod to. Dako2x pod ang korea town. Weird lang gyud ba nga naa sila sa US pero ilang signage kay Korean, hehehe! Nag ask ang driver kung unsa daw akong country ingon ko nga Philippines, ingon niya duol ra daw mi sa Philippines town basin ganahan daw ko moadto kibali mag drive around lang, nibalibad ko kay kabalikon na ko sa hotel. Daghan mi nastoryahan, about sa iyang asawa ug anak, etc. Nalingaw ko niya.

Paghunong gyud namo sa hotel, ang akong maidlot nga bana naa sa gawas naghulat-hulat intawon, hehehe! Pina-abtik dayon pagkakita nako, napaila2x nako sa taxi driver, hehehe!

Nindot kaayo akong feeling nga naka adto sa spa. Pag abot nako sa kwarto pina google dayon ko, "korean spa" ug didto nako nabasa kung unsa imong ma expect ig moadto ka sa korean spa. Dapat diay nagsearch ko daan dah, tsk tsktsk! 

Naa na koy plano sa sunod 7 days off namo. Adto ko sa American spa na pod. Sa Reno.

Hala pasensya na kay taas na man diay kaayo ni!

Sa sunod na pod nato nga kukabildo! Salamat sa paghapit :)

Pirti Nakong Hadloka!

Abi gyud nako ug katapusan na nako gainang kaadlawon padulong sa akong gitrabahuan! Tiaw bay nakalangoy ko ug pinakalit sa snow?! Aw morag dili to langoy, nahulog ko sa lawom nga snow, padughan kalawom! Naningkamot ko makabangon, akong gilangoy aron makahawa sa tunga sa snow!

Tulo na kaadlaw walay undang ang pagsnow nga nagdala pa gyud ug hangin. Wala koy work sa miaging tulo ka adlaw so ok ra. Maayo na lang pareho ra mi ug skedyul sa akong maidlot mga bana, naa koy tigdrive. Todo putos gyud mi sa among gisuot aron dili tugnawon. Sa pagpadulong pa lang namo sa among trabahuan naglisod na mi kay kusog kaayo ang snow, baga na kaayo, naglisod man gani mi paggawas sa among tugkaran. 

Ang akong sakyanan

Ang atbang sa among balay

Ang among tugkaran

Pag abot namo sa parking area mas grabe kabaga gyud pero maayo na lang medyo dako among gidala nga sakyanan so na okay ra. Bitbit namo among baonan nga bag, medyo bug-at kay good for 12 hours nga shift ang among baon, ug coffee cup nga naay taklob. Nagbulag na mi ug agian sa akong bana gikan sa security gate. Pagtikang gyud nako padulong sa direksyon sa among building nga medyo layo2x pa, ooops, patuhod ang snow! Nilingi ko sa akong bana ug nisenyas siya nga didto ra ko moagi sa parking area sa company owned nga mga sakyanan kay medyo mabaw lang so didto ko nisubay. Kusog kaayo ang hangin, kulang kaayo ang akong gisuot, wala gyud nakahatag ug kainit, nagsugod na ko ug kurog, higop2x na lang ko sa akong kape. Pag abot sa tumoy, nipaubos ko para motabok na sa among building, sus kay pirti man diayng lawoma! Nilubong akong lawas! Nakasyagit ko ug kusog, naglingi2x ko wala gyuy tawo! Unya morag ang palibot pulos snow gyud, morag dagat ug snow. Nakaingon gyud ko nga dili na ko kabangon ug motuskig na lang ko! Akong kape nalubong, grabe katugnaw akong tibuok lawas! Nagsugod na ko ug panic! Pero ingon ko sa akong huna2x, "Presence of mind, calm down, presence of mind!"

Mao ningkamot ko nga makabangon, higop dayon ko ug kape para mainitan, wala man gyud nako gibuhian ang akong kape. Nagkurog na kaayo ko nangita ug medyo mabaw nga kaagian, ug kaluoy sa Ginoo kadugayan nakakita ra ko ug kaagian nga taas2x sa akong tuhod pero medyo layo lang ang baktasunon padulong sa among building. Pagsulod nako sa building abi nako ug makuyapan ko! Lawom ug nag apas ko sa akong ginhawa, nideretso dayon ko sa akong locker, nagdali2x ko ug ilis ug scrubs. Pagtan-aw nako sa salamin pula kaayo akong nawong, nagtulo ang akong sip-on ug sakit kaayo akong tutunlan, ug pamati nako nafroze akong baga!

Sa akong sitwasyon, nahuna-hunaan gyud nako akong bana kay layo2x pod iyang baktasunon! Nagguol ko kay basin ug nasinati pod niya akong naagian! Maayo na lang gitawagan ko pinaagi sa telepono sa office (bawal ang cp sa minahan) nagguol pod diay intawon siya. Mora ko ug giibtan ug tunok pagkabalo nako nga okay ra siya. Nagpasalamat gyud ko sa Ginoo.

Sa akong nasinati, nakaingon gyud ko nga dili gyud magkumpiyansa sa snow diay kay sa imong panan-aw ok ra, mabaw ra, pero diay pirting lawoma ug pwede ka malubong. Ug nahuna-hunaan nako ang joke sa panahon pa tong batan-on pa ko nga naa daw kuno ika onse nga commandment, "Thou shall not kumpiyans". Dili lang gyud ni sa snow applicable ha, sa tanan ni nga aspeto sa kinabuhi, hehehe!

Salamat kaayo sa Ginoong Diyos nga na okay ra ko ug akong bana atong panahona! Pagkalisod na lang gyud mangita ug panginabuhian! Pero ana man gyud na ang kinabuhi, naay kalisod ug kaharuhay di ba? So okay lang, dili pa katapusan sa tanan! 

Daghan kaayong salamat sa paghapit ug pagbasa! Sa sunod na pod natong kukabildo :)

Nabunutan akong Pangalan sa Random Alcohol and Drug Test

Hinulam ra ni nga hulagway kang Mr. Google. Credit to the owner

Sa kapin Otso Siyentos nga trabahante, napili akong pangalan para sa alcohol ug drug test. Kada adlaw naay random test tungod sa kadaghan sa empleyado ug para masiguro nga walay bisan kinsa nga nilapas sa balaod sa kompanya.

Ang akong employer dako kaayo nga mining company ug grabe gyud ka strikto when it comes to alcohol and drug use sa mga empleyado. Of course, before ka dawaton, gawas sa background ug physical test, unahon gyud nila ang drug test. Naa pod kay pirmahan nga uyon ka for random test in the future, alcohol and drug test kung naay incident ug accident at work nga apil ka sa hinungdan o kaha biktima.

Lunes nako karong adlawa sa trabaho ug medyo nisayo2x ko ug adto sa work kay gusto ko maghang-out sa breakroom, mangape paresan ug binangkal nga hinatag sa isa ka Pinay ngari. Maayo nakong kiay2x gikan sa parking lot sa dihang nakita ko sa akong boss. Ingon niya, "Beth, I need to take you to the mine because your name has been randomly picked out for alcohol and drug testing". Akong tubag, "Seriously, Mr. John?". Kusog man gud mangomedya siya so wala dayon ko nituo, pero tinuod gyud daw. Sa akong huna2x, "Pastilan, bag-o pa ra ba gyud ko nangihi! 

Wala koy pamahaw so akong nerbiyos nisaka, gipanugnaw na ko ug sugod. Naa man gud koy kaila nga  natanggal kay wala kapasar sa random testing. Pila lang ka minuto mabal-an man dayon ang resulta ug kung positive, goodbye na gyud dayon sa walay paglangan bisag si kinsa pa ka ug bisag unsa pay imong posisyon sa kompanya. Ako sigurado man gyud ko nga negative gyud ang resulta kay wala man ko nag inom ug naghithit or nagdrugs, ang akong huna2x kintahay nga basin ug masayop ba ang technician, unsaun na lang. Impas gyud.

Nagkuha ko ug bottled water sa breakroom, nag inom gyud dayon ko ug daghan kay aron makafeel ko ug kaihion dayon. So gihatud ko sa akong boss kay Official Business man, ang company truck ang gigamit, dili gyud basta2x makagamit ug company truck/car diri, dili pareho sa  Pinas, alam na, hehehe!

Niabot na mi sa Security Office sa Minahan, ubay2x pod ka mga empleyado ang naa didto ug ako ra isa ang babaye. Grabe na gyud ko nanerbiyos kay morag winter time na man akong feeling, pirti katugnaw, nisugod na ko ug kurog gyud. Pero akong gikontrol akong kaugalingon kay ulaw sa mga pipol sa palibot, gilingaw2x lang gyud nako akong hunahuna mao medyo naulian, sige lang gyud ko ug inom ug tubig. 

Nianam na ug kagamay ang mga tawo, naay isa ka boss nga dakong ngisi kay pasar iyang tulo ka sakop. Duha na lang mi bilin. Ang akong kauban nga nabilin gitawag na pero pipila lang ka minuto nigawas sa testing room, niingkod ug balik, nasayop daw siya ingon niya, wala na lang ko nag sukit2x kay morag sad faced ra ba siya.

Ako na ang gitawag. Pagsulod nako gipabutang  ang akong mga gamit sa kahon unya gi-lockan ang kahon. Gipapirma ko. Ang akong gipirmahan kay mahitungod sa company policy ug akong pag uyon tung una sa random testing. Alcohol testing ang giuna, pinaagi sa breathalizer, gamay ra gud nga rectangular size nga tool. Mora kog nahutdan ug hangin paghuman nakog buga kay continous ang pagbuga dili pwede moundang hangtud mobeep. Point zero zero zero ang resulta. Gipapirma ko sa result. 

Sunod ang urine testing. Gipapili ko sa unopened boxes diin naa didto ang cup para mosalod sa ihi, dili gyud ordinaryo nga cup kay automatic na nga mogawas ang resulta didto. So ang instruction sa technician, hugasan ang kamot, dili sabunan. Gituman pod. Sunod, gihatagan ko ug duha ka minuto sulod sa CR, dapat daw makaihi na ko before mahuman ang dos minutos kay kung dili, balik ko sa gawas mag paabot hangtud kaihion. Unya ig makaihi dapat ang ihi moabot sa required nga kadaghanun sa cup. Ug... Importante dili i-flush ang toilet. Nakaihi gyud dayon ko in less than a minute ug halos napuno ang cup, so good kaayo. Ang technician na ang nagflushed ug gipahugas na ko ug kamot with sabon na. 

Pila lang ka minuto, niresulta na, negative siyempre, hehehe! Naa koy gipirmahan, ang uban initial lang ug gihatagan ko ug kopya. Nakaginhawa ko ug dako. Unya akong gi-imagine, what if nakainom ko or nag adik2x ko? Wala na koy trabaho karon! Mag-unsa na lang ko kung mawad-an ko ug trabaho unya ang rason kay positive sa drug test? Nakakabit na ang resulta sa akong employment record ug maglisod na ko pagpangita ug laing trabaho. Tsk! 

Salamat sa Ginoo nga wala gyud ko nag-apil2x anang bisyo nga drugs ug marijuana. Moinom man ko pero kanang naa ray okasyon. Ikaw, ingnun nato, mabunutan imong pangalan sa random test, makasiguro ka ba nga negative ang resulta? Ang akong ika-ingon, pareho sa gi-ingon sa akong mga kauban sa trabaho, "Good luck!"

Salamat sa paghapit ha, sa sunod na pod nga kukabildo. Maayong adlaw!