Taga Bukid Na Gyud Kaayo si Ako

Hiniram ra ni nga piktyur diri nga site. Mao ni ang golf course sa Round Mountain

Taga-Round Mountain na ko karon mao nga certified taga bukid na gyud ko. Sa pangalan pa lang daan sa lugar mahibal-an na :) Nagbalhin mi tung Sabado, October 26, 2013. Ug wala koy nahimo, ako maoy nagdrive sa akong sakyanan nga puno ug mga gamit kay si Ricardo nagdrive pod sa iyang Suburban nga nagtangag ug trailer nga puno pod ug mga gamit. Intawon paglabay namo sa Austin Summit nga 7484 ang elevation, ang karsada likuon unya sa kilid bangin, kulba my heart ug kurog my knee gyud akong peg ato. Pero sige ko ingon sa akong huna-huna, "kaya lagi ni!" Salamat sa Lord nakaya gyud. Upat pod ka oras ang among pagdrive kay hinay2x lang tungod kay bug-at ang dala. Mao to ang farthest and longest nga pagdrive nako sukad ko nakakat-on pagdrive. Pag-abot namo, nanakit akong apapangig kay gakaon ko ug bubble gum samtang nagdrive para mawala ang kulba kintahay.

Nganong sa Round Mountain man gyud of all places mi nibalhin? Tungod ani nga mga rasones: Oops, rasones ba ang plural word sa rason in bisaya? Whatever, hehehe!

Rason 1. Nakapuyo na ko ngari hasta akong mga anak, isa ka buwan ra nuon, tung pag abot namo from Pinas. Ug nakapuyo akong bana ngari ug more or less 10 years kay diri siya nagwork.

Rason 2. Sa dihang nagmoved na mi sa Winnemucca, ug nakapalit ug balay, aw, dili palit, loan lang :) narealized nako nga maypa wala mi nibalhin, kay gusto nako nga magwork gyud sa mine. Daghan minahan didto pero wala gyud koy swerti. Nag-apply ko diri sa Round Mountain 3 months ago, na-interview, pero una nga gipangutana sa ako sa HR kung naa ba daw koy kapuy-an ngari kay dili basta2x makakita ug balay nga marentahan ngari, akong tubag wala, kadto pa lang daan bagsak na ko, naka add-up to sa rasones nga wala ko nahire.

Rason 3. Sa dihang nang-lay off ug kapin gatus ka empleyado ang Hycroft Mine nga gitrabahuan sa akong bana sa Winnemucca, swerti wala siya naapil pero gipahibalo ang mga nangabilin nga maglay-off na pod daw ug another gatus na pod ka empleyado after a month. Ako gi-encouraged akong bana nga mag apply diri sa Round Mountain kay gusto gyud ko mobalik diri bisag ganahan na kaayo ko sa akong gi-workan as Receptionist/ Eye Exam Technician sa Northern Nevada Eyecare sa Winnemucca.

Rason 4. Nawadat akong bana kaluoy sa Diyos ug sa dihang nagpahibalo ang iyang gitrabahuan sa Winnemucca nga wala nay lay-off nga mahitabo mao nga gipapili ko sa akong bana to stay or balhin. Akong gipili nga mobalhin mi, parentahan ang among balay or kung naay mopalit among ibaligya, ug mag-undang ko sa work. So gi-accept sa akong bana ang offer sa Round Mountain, ni-quit siya sa Hycroft ug niquit pod ko sa NNEC, ug namalhin mi.

Rason 5. Taas2x ni nga rason :) Pila na lang ka tuig akong maidlot nga bana moretire na, pahumanun na lang akong mga anak, God willing, meaning, wala nay good Health Insurance, ug mag agad na lang sa iyang SS, ok lang kung sa Pinas siya mopuyo kay wala gyud problema kay dako2x man kung maconvert sa peso ang iyang binuwan, pero di pa man ko ready mobalik sa Pinas kay gusto pa ko magwork ngari aron makatigum. Kung magwork ko ngari sa Round Mountain bisag sa ilang grocery store lang, which is owned by the mine, naa na koy health insurance ug 401 K, kibali connected japun ko sa mine.Mao nay akong tumong, gihunong na lang sa nako akong pangandoy nga magwork sa sulod gyud sa minahan. I want to take care of my palanggangging para makabalos ko sa iyang kaayo sa ako ug sa akong mga anak, laliman ka nga iyang pangalan "Rich" pagkailan namo, karon "Poor" na intawon :( Bitaw, seryoso na ni, lisod baya magpaeskwela ug duha ka estudyante sa Pinas, labina ilang pamasahe back and forth ig-mouli sila ngari plus ang bayad sa Re-entry permit pa, impas pirmi ang kwarta sa akong bana, luoy pod kung dili maatiman kung siya na ang angay atimanun. 

Rason 6. Naa mi Mexican friends nga si Adan ug Josefina Gutierrez diri sa Round Mountain, duha ilang balay, giparentahan sa amo ang isa :) Dugay na ilang balay nga bakante, andam para sa ilang anak nga kinamagulangan unya high-shool pa karon pero kay magcollege man siya so kami lang sa mopuyo pero mangita mi ug mapalit nga balay kung mahalin ang among balay sa Winnemucca.

Rason 7. Ganahan ko sa Round Mountain kay simple living lang: naay library nga pwede ka makagamit sa ilang Internet, books ug movies, naay gym nga libre ka mag-exercise with weights, stationary bike ug uban pa nga klase nga pang exercise, naay indoor swimming pool ug indoor basketball court, naay pre-school, grade school, middle school ug high school. Naa poy park, lake nga pwede ka mamingwit ug duha ka isda nga dili need ang license, hehehe! Diri man gud sa US dili ka pwede mamingwit kung walay lisensya, maglukat gyud ka. Pero diri sa Round Mountain, pwede bahala walay license basta duha ra kabuok ang kuhaun kada tawo, hahaha! Naa poy post office, ug water and sewerage office. Naa poy golf course, naay grocery store nga tam-tama lang pod kadako, naay gas station, ug siyempre naay Police station. Naay restaurant o fine dining unta ang name is "Full Moon" pero na deadz ang tag-iya unya wala daw pamilya ang tag-iya walay ni-take over, so bakante ug empty ang building. Pero naay Bar nga ang tawag "Half Moon" nga pirti nakong bahak-hak ug katawa kay abi nako dili tinuod pero naa gyud diay. Nacute-an lang ko ba kay Full Moon ug Half Moon man gud :) Ug ang pinaka-importante, naa poy mga simbahan ngari like baptist, lutheran, mormon, catholic ug uban pa.

Rason 8. Duol ra kaayo ang mine gikan sa subdivison, more or less 10 minutes ra. Dili na need mag sakay sa bus ug isa ka oras paingon sa mine, like sa halos tanan mines sa Winnemucca. Tung una ig-mo work si Ricardo ug pang-adlaw, mogikan siya sa balay ug 3:30 sa kadlawon makauli siya ug 7:30 sa gabii. Diri, mogikan siya sa balay ug 3:20 sa kadlawon makauli siya ug 4:10 sa hapon. Mao ra ang hours sa sweldo kibali diri ug didto. Unya naa pay 7 days off diri plus iyang Personal time off, pwede  niya magamit kung mouli mi ug Pinas, God willing. Nawala na man gud ang 7 days off sa iyang giworkan sa  mine sa Winnemucca gud.

So mao na ang mga rasones mao nga mas gipili pa nako nga mobalik sa Round Mountain. I hope wala ko nasayop, pero whatever happens, I know nga I will be fine with God's guidance and I know I can come back to Winnemucca anytime. Dili lang ko gusto nga moabot ang adlaw nga maghandum ug magbasol ko kay wala nako gibuhat ang gusto nako nga buhaton.

Pero siyempre walay Pinoy foods ngari, aw naay tilapya ug tahong nuon sa tindahan pero kana ra pod, mao nga molugsong mi either sa Las Vegas or sa Reno. Upat ra ka oras paingon sa Las Vegas ug 4 ka oras ug 12 minutes paingon sa Reno, per Mr. Google :) So kung winter time, adto daw mi sa Vegas kay warmer didto ug talagsa ra magsnow ug kung summer, adto mi sa Reno. So didtoa mi ani nga lugar molugsong aron manabo.

Salamat sa paghapit ha? Tsika ta sa sunod. Babush!

Pagkalisod Diay Kung Mawad-an Ug Minahal sa Kinabuhi Diri sa Amerika

 

Ang akong asoy karon mahitungod sa pagtaliwan sa kapikas sa kinabuhi sa akong amiga nga si Emy. Atake sa kasing2x samtang natulog ang hinungdan sa iyang hinanaling kamatayon. Nakatawag pa siya sa 911 ug niabot ang Paramedics pero wala na gyud natabang.

Pagkadawat gyud nako sa balita, dali2x gyud dayon ko sa pag-adto sa ilang balay nga medya oras pod ang daganun sa sakyanan gikan sa amo. Samtang duol na ko sa ilahang balay, nakita nako ang duha ka sakyanan sa Pulis sa karsada atbang sa ilang balay. Mosulod na unta ko sa kural nila Emy pero nihunong sa ko ug gipaubos nako ang bintana ug nitimbaya sa ilaha, "Good morning Officers!" Niyango pod sila ug niingon ang isa, "Can you pull over this side?" Ni-pull over pod ko. "Are you Emy's friend?" Nitubag ko, "Yes" ug niingon siya, "Okay you can go inside. The funeral car is gonna be here in few minutes so you may just park in the side of the fence".

Pagsulod nako sa balay, naa poy Pulis, babaye, nag-ingkod sa kilid dapit sa kwarto nila Emy. Kibali nag atubang siya sa kang Emy nga gicomfort sa duha ka Pinay nga common friends namo. Maayo kay naa pod ang bana sa isa ka Pinay. Naa silang tanan sa sala. Pagkaluoy ni Emy. Akong huna-huna nga intawon mag unsa na lang siya. Wala silay anak ug wala poy pamilya gawas sa pamilya sa iyang bana nga tua pod sa lain-lain nga State. Pagkalisod. Mora gyud ug gikumot akong dughan nga nag- imagine. Niingon ang akong isa ka amiga nga ang patay nga lawas naa sa kwarto kung gusto ba ko mosud-ong sa katapusang higayon. Nipaingon pod ko sa pultahan aron abrihan pero gipugngan ko sa pulis nga babaye. Ingon niya, "I am sorry, you are not allowed to see the body". Nashocked gyud ko! Wala siya nihatag ug klaro nga rason pagpangutana nako ngano. Ako na lang siyang gi-ask, "Is it for health reason?" Niingon pod siya ug " Maybe". Ako siya giingnan nga sa Pinas pwede man gani gakson ang patay sa hingtungdan. Nangutana ko sa akong amiga nganong naa man tuod mga pulis? Ana diay na diri? Nagsearch daw sa balay kung naa bay armas. Ug nagpaabot pod sa funeral car. Ug aron pod siguro magbantay nga walay makasulod sa kwarto. Dili baya ingon ana sa Pinas, di ba?

Mga medya oras pod nga puro danguyngoy ang madungog sa sala ug sa dihang gusto mosulod si Emy sa ilang kwarto kay aron mosud-ong sa iyang bana, wala gyud nisugot ang pulis bisag nagpakiluoy na siya, halos moluhod na lang siya sa pulis nga nagdanguyngoy. Wala gyud naluoy ang pulis.  Nakaingon gyud ug "grabe, walay konsiderasyon!" sa akong huna-huna. Ang isa pod nga nakalisod kining mag-eninglish lagi pod diri. Mas sayon baya mag storya kung mag binisaya. Paghangyo ni Emy nga mosud-ong sa iyang bana, pagpakiluoy niya, eninglish! Lisod uy!

Pipila ka minuto, niabot na ang funeral car, gihung-hong ra sa akong amiga. Among gipugos ug dala si Emy sa pikas kwarto para di niya makita ang patayng lawas nga alsahon gikan sa  ilang kwarto. Kusgan kaayo ang babayeng pulis kay naalsa niya si Emy nga nag hysterical pirting hilak para maplastar sa katre. Dugay pod mi didto sa sulod. Paggawas namo wala nay mga pulis, wala na ang patayng lawas. Wala gyud ko kasud-ong.  Wala na gyud pod kasud-ong si Emy sa iyang bana. Paperwork ug calling card sa punerarya ra gyud ang akong nakita paggawas namo. Wala gani ko kakita unsay dagway sa ilang karo ngari.

Gidala na ang patayng lawas sa punerarya ug isulod daw sa room nga bugnaw until mahuman ang pag-imbestiga ug tungod kay weekend man ug Labor day pa gyud, Martes pa daw maprocess.  Imbestigahan man gyud daw aron masiguro nga walay foul play sa iyang kamatayon. So walay vigilan kay dili man pareho sa ato nga igkahuman ug embalsamar, ibutang sa casket then vigilan. Pero kada gabii kaming mga Pinoy ngari naningkamot gyud nga makaduaw kang Emy kay siya ra ug ang iyang duha ka bayaw ug isa ka bilas ang naa sa ilang balay. Mingaw kaayo.Unya magdala pod ug pagkaon. Magsabot unsay dalhon nga pagkaon ug kinsay moluto. Bilib ang bayaw ni Emy sa mga Pinoy kay tinabangay daw.

Milabay ang weekend ug Labor day, naprocessed ra gyud ang dapat iprocess, nagdecide si Emy ug ang family nga ipacremate ang patayng lawas so gidala sa Carson City aron macremate didto nga it takes 10 days to 2 weeks daw. 

So gahapon, isa ka semana ang nilabay, naay funeral service sa simbahan   ug picture na lang gibutang instead nga casket or ashes. Ubay2x pod ni-attend sa simbahan. Ug akong napansin, walay kanta ang misa sa patay ngari, dili pareho sa ato nga naay kanta pinamingaw.

Pagkahuman sa misa, naay luncheon sa basement sa simbahan. Daghan kaayo pagkaon, ug ang mga pagkaon dala to sa mga tawo nga niattend. Ang akong gidala kay puto cheese ug Humba. Ingon ana diri, ang mga tawo maoy modala ug food, potluck kibali.

Karon ang among gikagul-an kay ig mouli na ang mga bayaw ug bilas ni Emy, siya na lang mag-inusara, dili man pod pwede nga kada adlaw mi magbisita. Ang amo na lang sabot nga kung kinsa tong ang bana magwork sa gabii, didto nalang matulog ila Emy para naa siyay kuyog. Next week pang-gabii si Ricardo so basin didto ko matulog. Di ba kung sa ato, daghn tay kapamilya ug dili gyud ta mag-inusara? Lahi diri.

Kung tugutan ko ni Lord nga matigulang ko, mouli gyud ko sa Pinas aron didto ra ko ma deadz.

Salamat sa paghapit. Tsika ta sa sunod ha?

Gisapot Tungod sa Pagpalit ug Tiil Sa Manok

Tiil sa Manok or Chicken Paws

Sa unang higayon, nakakita ko ug tiil sa manok/chicken feet o "chicken paws" nga baligya sa Walmart gahapon mao nga sa walay pagduha2x ako dayon gibutang sa akong cart. Pirti nakong lipaya kay nakatayming ko.

Pagbayad na nako sa cashier, akong nakita nga gitutukan gyud niya ug maayo ug nangutana, "What are you going to do with these?" Ingon ko, "I will cook and eat them". Nilagat iyang mga mata. "Really?!" How do you cook them?! Ug nihirit si Ricardo, "Yes, she eats those (pina-smile pa). She eats other "shitty" part of the chicken and other stuff like "Balut" and dried fish with eyes staring at her, etc." Nisamot ug kasiga ang mga mata sa cashier. Ug nisugod na ko ug kasapot. Sa akong huna-huna, "unya lang ka Ricardoha ka, makatilaw gyud ka". Morag nakabantay si Ricardo nga wala na ko sa mood, nagpasumangil nga mogawas siya para ipark niya ang car up- front aron daw pag-gawas nako dili na ko magbaktas paingon sa parking area kay tugnaw lagi kaayo. 

Ang tsismosa nga cashier wala pa gyud nahuman ug pangutana, "Can you tell me more what part of the chicken you eat? while nagkabusy pag-swipe sa uban pa namo nga pinalit. Ingon ko, "Liver, gizzard..." Ingon siya, "Liver is not bad, I do eat liver sometimes and I think gizzards are not bad too. Paminaw nako nakabantay ang kanahan nga gisapot ko mao "not bad, not bad" na ang iyang tubag kunuhay. Pero pag-ingon nako nga "I also eat chicken intestines"... Nga-nga ang kanahan! Wala dayon siya kabalo unsay itubag! Naghuna-huna pa siguro. Pagkahuman niingon, "Well, I learned some things today. Interesting! But I think I would put red nail polish first on the toes before I eat them" while gitan-aw utro ang mga tiil sa manok. Ingon ko, "Of course I will cut the toes first before I cook them. I don't eat chicken nails!" Ug pina-snob nga nitulod sa akong cart pagawas. Dili na madrawing akong dagway.

Pag-gawas nako, nakapark na si Ricardo, dali-dali dayon siya ug tabang pagpamutang sa mga napalit sa trunk sa car. Ug wala na ko naghulat nga makasulod mi sa sakyanan, pirti na dayon nakong yaw-yaw sa iya kay nag-apil2x lagi. Ingon ko, "You already have sensed that the freaking cashier thought it was yucky to eat chicken feet yet you added up more shit foods that I eat. Next time you do that I will slap your face in front of whoever makes me feel bad for eating Filipino foods! You freakin' remember that!!!!" As in pirti nakong sukua sa iya. Aw pirti pod niyang sorry kay kung dili siya mag-sorry tingala man ko ug moundang ko ug yaw-yaw bahala magkatuwad baliskad akong eninglish. Dili na daw niya utruhon. Dili daw niya intensyon nga malain ko. Dili daw siya gusto nga laparuhon nako siya mao sure gyud daw nga dili na niya utruhon. 

Ambot kung kamo dili ba malain. Basta ako nahagit gyud akong garbo. Dili ko gusto nga tamay-tamayon ko kay nikaon ko sa mga pagkaon nga akong naandan. Pilipino ko ug mokaon ko sa halos tanan nga pagkaon sa Pilipinas.

Pero peace na mi ni Ricardo, basta magsorry na siya nga kinasing-kasing ug mo-promise nga dili na utruhon kay ako man gyud tinud-on ug kabalo siya nga akong tinud-on, peace na mi ana :D

Maayong adlaw! Salamat sa paghapit.

Walay Suot2x Ug Panty, Kaya Na Nimo?

This photo is grabbed from Google- Hinulam ra ni :D

Ako gyud ni gi-blog kay morag shocking ni siya para sa ako, para sa ako lang ha? Ug morag gilukan ko mag-huna2x man gud ug medyo weird pod, hehehe!

Naa koy kauban sa work (bag-o nako nga trabaho) nga dalaga pero naa siyay kalive-in, Italian-American siya, medyo chubby pero naa siyay hawak, as in okay pod iyang porma sa lawas. Ug grabe ka-igwad ug lubot, morag bola. Isa ka kadlawon nangadto mi sa Walmart kuyog namo isa ka Pinay nga kauban pod namo sa work. So samtang naglakaw2x mi, nakalabay mi sa section sa bra ug panties. Iyang gikomedyahan among isa ka kauban nga paliton to kay bagay sa iya. Nikatawa ra among kauban. Ingon ko, "Nope, I don't think she would buy that. She wears expensive underwear like Victoria's Secret". Iyang tubag, "Well, at least I save a lot of money because I don't wear panties!"  

Super nashocked akong beauty pagkadungog. Pa-effect lang ko nga wala ko nashocked, ako siyang gipangutana, "Do you itch when you wear panty? I heard that there are few people who can't wear panty because they itch and it would just cause infection down there". Iyang tubag, "No, it runs in my family. My mother and father don't wear panties too". As in seryoso gyud siya! Wala ko kabalo sa akong itubag pagkadungog nako sa iyang tubag, hehehe! Shocking to the highest level, hahaha! Kay kaila man gud ko sa iyang Mama ug Papa. Kauban pod namo, hahahaha! Di ba naay tawo nga dili makasuot ug bra kay mangatol unya naa poy uban nga igmatulog dili pod magpanty kay igangan ug dili sila komportable, pero karon pa ko kadungog nga sukad2x di jud magpanty! Unsaun na lang kung naay "mens"? Gusto nako siya pangutan-on pero wala na lang kay basin mahalata ko, hehehe! Ako na lang gihuna-huna nga basin magsuot ug tampon instead nga napkin kung mag mens. Pero sa akong pag-imagine sa tampon nga ipansak, ayayay, kagil-as ba! Hahahaha!

Karon dili gyud nako mapugngan nga mamuot every time makita nako silang tulo labina iyang Papa, hahaha! Aguy morag dili nako makaya nga maglakaw ko nga di magsuot ug panty, basin sige ra ko utot tungod sa panuhot, hahahahaha!

Kamo, kaya na ninyo?

Salamat sa paghapit :D Sa sunod na pod natong kukabildo.

Ug sa Dihang Gidudahan Mi!

Kusog kaayo ang hangin niadtong mga pipila ka adlaw mao daghan kaayo mga bisag unsa na lang nga mga sagbot, basura ug uban pa nga napalid sa palibot sa among balay mao nga gi-operasyunan namo ug pamunit ni Ricardo, gikarga namo sa iyang van nga edaran na pod liwat niya :D

Pagkahuman namo ug pamunit among gihatud sa basurahan unya nagdecide mi nga moderetso ug town kay naay paliton. Akong plano gyud nga mosimba ko pagkahuman ug magluto  ug madala sa simbahan kay naay kaon after sa simba didto ra pod sulod sa simbahan. Kining akong kurdapyo nga maidlot daghan pod diay plano nga adtuan like didto mi sa storage kay naay kuhaun, unya niadto mi sa balay sa iyang amigo nga nidagan pagka commissioner sa town, (kanang nakapilit nga ngalan sa sakyanan) unya sige pa storya nalangan na mi plus niadto pa sa laing tindahan nagpalit ug iyang masuot nga underwarmers kay tingtugnaw na man lagi.

So morag di na gyud nako maapas nga mosimba ug magluto pa kay pasado alas kwatro na unya ang simba magsugod ug alas sayis. Nakahuna-huna ko nga magbuy na lang ug cake unya akong i-drop off sa church kay nag signed up man ko last Sunday nga dessert akong dalhon. So nagbuy mi ug duha ka klase nga cake.

Hapit na gyud alas singko, nihapit na mi sa simbahan. Tan-awon sa gawas morag walay tawo, ninaug ko ug akong gituyok ang knob, naka-locked. Niadto na pod ko sa pikas sa door, locked japun. So hulat2x lang mi sa atbang sa simbahan. Niingon ko kang Ricardo, "Mahal, how about if I will knock on the door of that house across the street to leave the cakes then I will send a message to the Pastor's wife's Facebook to inform her?" Ang iyang tubag, "Mahal you can't do that here. You don't know them." Akong tubag, "Okay, so we will stay a little bit then."

Morag dugay2x na gyud mi ug standby didto, ako nagkabusy ko sa akong cp, nagtry ko ug online kay magdula ug Words with Friends. Pipila ka mga minuto nilabay, mga 15 minutes, di na man mi kahulat, akong giingnan si Ricardo nga moadto mi sa among dati nga balay kay naa koy morag na-amiga na sa church nga taga didto, tigulang nga babaye, akong tawag sa iyaha, Ms. Barbara. Wala ko kabalo sa iyang address pero nakadumdum ko sa color ug hitsura sa iyang sakyanan, basin makita namo nga nakapark sa tugkaran so among tuk-tukon. Nisugot pod si Ricardo. Gipaandar na niya ang sakyanan.

Paglarga niya, naay Police car among kasugat, ingon pa gyud si Ricardo, "Here comes the Police"...  Ako kita pod ko sa police unya nagkabusy na pod dayon sa phone. Kung makasugat ko ug sheriff or police car, moingon ana pod ko. Ug sa pipila ka segundo, nalisang ko pagkadungog sa gisulti ni Ricardo, "How come we are pulled over by that Police?" Pagtan-aw nako sa among likod, tua na, nagkidlap2x na ang suga sa patrol car. Nibalik diay sa agi ug gisundan diay mi. Akong gitan-aw kung nagseat belt ba mi duha ni Ricardo, nagseatbelt man, akong huna-huna, "Unsa may violation nga nahimo ni Ricardo?!"

So nagpaingon na ang Officer sa sakyanan, naghulat mi. Ug sa dihang naa na siya tungod sa bintana sa side ni Ricardo, niingon, "Sir, somebody called the authority that you two looked suspicious sitting in front of the church." Kalma ra ang tingog sa Officer. Mora ko ug kakuyapon naminaw pero ako lang gyud gipugngan! Mao diay nibutho ang Police kay kami man gyud diay ang tuyo! Kalma pod ang tubag ni Ricardo, "We did?" Gidali2x dayon nako ug kuha ang cake sa akong tiilan ug akong gi-explain sa officer nga nagpaabot mi kung naay maabri na ang church kay aron ma drop off namo ang cake. Wala na katingog si Ricardo kay ako na may nakig istorya sa Police! Ingon ang Police, "When I saw you both, I didn't think you were bad guys"... unya nikatawa pero unsan man trabaho man daw niya. Haaay... nakaginhawa gyud dayon ko ug dako! Pastilan!

Paglakaw sa Police gihagad na nako si Ricardo nga manguli na lang mi ug kaunon na lang ang cake, hehehe pero agian na pod namo ang simbahan kay basin abri na. Pag-abot namo sa simbahan, naay mga tawo sa balay atbang, nanulod dayon sila unya pagliko namo para makita ang isa ka door, nakita namo ang asawa sa Pastor naghakot ug mga foods gikan sa ilang sakyanan! Nalipay ko! Pagnaug nako sa sakyanan, akong gitan-aw ang balay sa atbang, namuot ko kay nanilib sila sa screen sa ilang pultahan, hahaha! Grabe gyud nakong katawa!

Gi-storyahan nako ang asawa sa Pastor ug pirti pod katawa, hehehe!

Pandamay nga German chocolate cake ug red velvet cake!

Anyway, pagpaingon namo pauli na, ingon ni Ricardo, nga sa sunod daw gani, pa-storyahon pod daw siya, kay wala na daw siya katingog dayon pag sugod nako ug storya, hahaha! Ako pod siya giingnan nga tungod na sa iyang sakyanan nga morag pang-"kidnapper" ang hitsura, mao nga we looked suspicious, hahahaha! Pirti pod niyang katawa! :D

Nakita na man ninyo ang hulagway sa iyang van, agree mo no nga morag pang-"kidnapper" no? Kana nga van, gihatag ra na sa iyang Mexican friend kay ang iyang friend, nagbuy ug shed unya gipakapin sa tag-iya ang van, daghan man siyay sakyanan nga pareho ra ug edad sa van, mao iyang gihatag kang Ricardo. Si kurdapyo nipahalipay ug $50.00 pinugos gyud kay dili halos dawaton. Bisag mao ra na ang hitsura sa van, bag-o ang engine ana kay gigastuhan gyud na ni Ricardo ug almost $2,000 pirti nakong laguta kay dili worth it ang dagway, hehehehe!

Na hala mao ra to kay morag nagtaas na ang atong kukabildo :D

Salamat sa paghapit!

Ang Basurahan Ngari

Magkukabildo na pod ta!

Naka-blog na man ko mahitungod sa basurero, karon ang akong i-share ang basurahan ngari. Tanan balay nagbayad gyud ug serbisyo sa tighakot ug basura kada bulan pero pwede pod nga ikaw mismo maoy molabog sa imong basura didto sa labayanan gyud mismo labina kung daghan kaayo imong ilabayay unya dugay pa ang sked sa basurero. Kaisa ra man kuhaun ang basura sa isa ka semana. Tung didto pa mi sa duol sa lungsod, kadaghan na nga higayun nga hagaron ko ni Ricardo nga mokuyog maglabog sa mga basura, kanang gikan siya maghinlo sa garahe pero di gyud ko mokuyog kay pagtuo nako baho kaayo didto, daghan mga langaw ug uban pa.

Nasayop ko kay dili man diay mao akong huna-huna. Tung nakabalhin na mi ug balay, malabyan na namo ang crossing paingon sa dumpsite. Isa ka adlaw gihagad ko ni Ricardo nga maglabog sa mga karton ug uban pa pagkahuman namo ug pangplastar sa mga gamit sa balay. Nisugot ko naluoy na ko sa akong bana nga himos ra ba kaayo ug tingog mohangyo, hehehe!

Mao ni ang mga hulagway:

Moagi sa gyud ka sa ilang opisina. Mao na ang sakyanan nga among gisundan. Natingala ko nganong nihunong man ug mga pila ka minuto. Ay, kay timbangon man diay ang sakyanan sa naa pay sulod ug paghuman na pod ug labay, mobalik na pod para timbangon utro, i-minus ang timbang sa sakyanan, ang mabilin mao na ang timbang sa basura nga imong gidala. Sa ani nga paagi daw mabal-an kung pila ka tonelada nga basura ang gilabay anang adlawa. Maayo pod no?

 Basaha na lang ang nakasulat sa paskil :)

 Paingon na mi sa timbangan, ambot asa ang timbangan diha hehehe, nalipat ko ug kuha sa hulagway.

 Ang opisina. Tigulang nga babaye ang nagbantay. Nag ask siya kung unsa among ilabay. 

Pagkahuman iya na mi giingnan kung asa mi dapat moadto.

Naa poy speed limit no? Kinsa kahay mopakusog ug padagan, hehehe! Naay mga paskil kung asa dapat ilabog depende sa imong dala nga basura.

Ang dako nga mamang. Lain man iyang ligid, unsa kahay iyang trabaho ana.

Niay pay isa ka dako nga mamang. Mao siguro nay tigtapok sa basura.

Mga napislat nga plastic butanganan ug tubig. Andam na para recycling.
Morag kadtong isa ka dakong mamang siguro ang nagpislat sa mga plastic no?

Pundok sa mga guba nga washing machines, dryers, refrigerators, freezers ug uban pa.

Ang view pasulod/pagawas sa basurahan, paingon na sa gun range ang dalan sa unahan.

Kung hagaron ko utro ni Ricardo maglabay ug basura mokuyog na ko kay okay ra man diay kaayo, morag dili man basurahan sa akong panan-aw, hehehe!

Morag nakaadto na pod mo no? Mao na ang basurahan sa among bukid. Salamat sa pagkuyog :)

Mao ra to. Sa sunod na pod nga pagkukabildo. 

Daghang salamat!

Akong Trabaho Tung-una

Pakigkukabildo sa mga ginikanan sa Lapaz, Agusan del Sur

Pakigkukabildo sa mga ginikanan sa Veruela, Agusan del Sur 

Ako ug akong Boss pauli na gikan sa San Marcos, Bunawan, Agusan del Sur (lugar ni Lolong)

Posing2x kay nindot ang view sa Langasian man yata ni, sa La Paz, Agusan del Sur

Ako, akong Boss ug ang Municipal Population Officer sa Esperanza, Agusan del Sur

Sa opis nagtinapulan

Sa opis gihapon, lipay kaayo nga nakadawat ug roses gikan kang Ricardo

With Tata Dingding, my former co-worker, posing sa before maglecture sa mga students

Haay, gimingaw na gyud ko sa akong trabaho tung-una sa wala pa ko niari aning lugar sa mga ugis, feeling nako fulfilled kaayo ko that time, feeling nako mao gyud to ang akong "calling", hehehe!

Plus ganahan ko kay klase2x akong means of transportation, magsakay ug Bachelor, tricycle, motorsikad, habal2x, paypag, pumpboat or bangka ug naa pay higayon nga nagbaktas ug pila ka kilometro. Naa man mi service taraw, L300 Van nga sige ra kadaut ug kung dili man gani daut, panghi-way lang taman kay basin ug madautan sa dalan unsaun na lang labina in the middle of the jungle. Aguy.

Usahay makahigda sa maayong higdaanan, usahay sa kwarto nga daghan lamok, usahay sa katre nga guot. Usahay makaligo  ug tarong ug usahay basta lang mahugasan ang angay hugasan, hahaha!

Uy, in fairness kasagaran makakaon ug lamion labina kay presko ang mga utanun pero naa poy higayon nga magpalit na lang mi ug pan isa ka putos sa tindahan.

Klase2x nga mga tawo ang mahimamat... bata, tigulang, pulitiko ug ordinaryo. Usahay daghan kaayo motambong, naa poy higayon maihap ra pod sa tudlo kay tua kasagaran sa uma nananum.

Enjoy kaayo ko kung adto mi sa school kay makarelate ko sa mga estudyante kay naa man pod koy mga anak nga pareho nila ug edad. Kada adto nako sa school, ma-appreciate gyud nako ang ilang katawa ug agik-ik ug bahakhak sa among topic about love, crushes, etc. "It's nice to be young" gyud dayon akong drama, hahaha!

Bisag miagi ug kalisod, kalisang (pagsakay sa atubangan sa  driver sa habal2x) ug kahadlok kay usahay magabhian sa dalan, wala gyud nisantop sa akong huna2x nga maayo pa moundang na lang. Makita sa piktyur nga all smile kaayo ko, mao nay nagpamatuod nga nagustuhan nako akong trabaho, hehehe! Kuntento kaayo ko sa akong trabaho kaniadto. Para nako, isa to sa pinaka the best nga adventures nako.

Wala lang, gishare lang nako, hehehe! Pawala sa kalaay ning kahapunon diri sa lugar nga banyaga.

Salamat sa paghapit, kita kits sa sunod!