Ang Budbod, bow...!

Niabot ko ug kakugi sa kusina mao nga nakahuna-huna ko pagluto ug Budbod. Ikaduha na nako ni nga pagluto pero ang permiro kay napalpak tungod kay gisagulan man nako ug tapul, unya ang tapul ngari kay pirti man diay kagahi, bisag gihumolan. Morag nagkaon ko ug batuon nga budbod atong mga panahuna, unya gawas sa naay sagol gahi, medyo tab-ang pod ang timpla ato mao pirti gyud ka palpak.

Karon kumpiyansa na gyud kintahay ko nga morag mao na gyud ni, hehehe!

 3 cups Pilit nga bugas- wala gyud nay sagol ha? Pure gyud na :)

Gihumulan nako na ug 4 ka oras.

      Dahon sa saging-kalimot na ko sa presyo basta mahal

pero sosyal ni nga dahon kay frozen

 1/2 cup nga white sugar ug 1tsp. salt

3 cans nga gata- di ko sure kung pure ni kay lahi ra gyud 



 Gipabukal ang gata hangtud morag molana2x na, isagol

dayon ang asukar ug asin, karawon ug maayo

Pag medyo uga2x na gyud siya, isagol dayon ang pilit

Ingon ani na dayon ang hitsura, pwede na putson

 Naputos na :) pinaplastar gyud no? tan-awa ang dahon, dili linghud

 Mga way pulos nga dahon kay daghan gisi

Gitak-ang na, hapit na gyud :)

  

 Hiniram ra nako ni sa akong amiga ang steamer, yup, uso pod

ang hiram2x ngari, hehehe! Gamay man gud akong steamer

pagkahuman sa 45 minutos, luto na gyud :)

 

Tadaaaang! Budbod gyud kaayo :)

Karon sa akong pagtype, haskang busuga nako, salamat sa Ginoo:)

Salamat sa paghapit.

Nagkita na Pod!

Nihirit ko sa chicken wings ni weng

Showgirls

Kuyaw nga ads no? Pero naa pay mas kuyaw ani

layo ra kaayo ang pagkakuha ani nga pic with Spiderman :)

char kaayo!

posing before nisulod sa Harrah's for lunch

posing sa mi samtang naghulat sa Monorail

akong foods- first plate

kang weng-first plate

Daghan pa pictures diri. Ug diri pod. Paki-click na lang. Salamat.

Sa sobra ka pinangga ni John kang Weng (hehehe!) ug sa sobra ka inlababo ni Ricardo sa ako (hahaha!), gipatumanan gyud mi duha ni Weng sa among sabot nga magkita na pod mi utro pagkahuman mi naalanganin sa among pagkita sa Arizona. Intawon abtik pa sa kilat ang kabanahan.

Imbis mobisita ang isa ka anak ug ang apo ni Ricardo nga taga Arizona pod sa amo kay Spring break man, gisabot na lang niya nga sa las Vegas na lang mi magkita kay aron dili lang gyud magconflict sa sabot namo ni Weng. So nag-una mi ug isa ka adlaw sa flight nila weng para makaspend pod mi ug time sa anak ug apo ni Ricardo. Isa ra among hotel nga gi-stayhan kay aron dili hassle kay wala man mi car kay nagfly man lagi. Sa Imperial Palace mi nagstay. Medyo karaan na siya nga hotel pero naa gyud sa strip ang iyang location ug under renovation nuon. Dili kaayo nindot ang room pero ganahan ko kay mga bag-o pa kaayo ang ilang towels. Mga puti gyud kaayo.

Lunes sa udto niabot sila Weng sa hotel, naglunch pa sila ug nagrest kay kapoy man sa biyahe samtang kami pod ni Ricardo nagkuyog sa iyang anak ug apo naglibot2x sa siyudad kay mouli na sila pagka ugma pero nag text2x mi niya or tawag every now and then. Nagpaabot pa si Weng nga momata si John so wala pa gyud siya nakanaug. Layo man sila sa among kwarto. Naa sila sa 12th floor sa Tower 1 ug kami sa 7th floor sa Tower 4. Hangtud gabii na. Gikapoy na akong ugis. Nagtalk mi ni Weng nga naa daw sila sa Pizza house ug ingon ko nga moadto ko aron magkakita mi. Nihangyo si Ricardo nga kung pwede ugma na lang kay kapoy na siya ready na siya matulog. Ingon ko, "Okay, I will go alone. If I can't come back after an hour, that means, I'm gone." Abtik intawon siya nibangon, hehehe, sabay panghuy-ab.

So nagkakita gyud mi atong gabhiuna. Si Ricardo sige ra gyud panghuy-ab. Naluoy na mi mao nga nagsabot mi nga mamalik na sa kwarto ug magtawagay na lang mi. Nagdungan mi ug paingon sa elevator. Gihatagan ko ni Weng sa ilang room number, kuan kuno 2110, ako pod gitiman-an. Samtang nagbaktas mi ni Ricardo paingon sa among kwarto (taas-taas pod among lakawunon) sige ko ingon "2, 1, 1, 0" kay para mamemorize nako kay aron tawagan nako sa telepono sa among kwarto. Ingon ni Ricardo, "Mahal, I don't think that's the correct room number because Weng said they are in the 12th floor. It's should start with 12." Ingon ko, "Maybe".

Pagsulod gyud namo sa among room ni-ring ang phone, pagtubag nako si Weng, hehehe, gitawagan dayon ko niya kay dili daw mao ang iyang number nga gihatag.Tama si Ricardo. So hala grabe namong tsika sa telepono, grabe lagi mora mi ug mga tala nga magkita man unta mi pagka ugma. Kung unsa na lang among gipanghisgutan, mga plano nga negosyo diri sa US, mahitungod sa mga anak, etc. Hangtud nabatian nako nga nahagok na si John, klaro kaayo nako, hehehe! Si Ricardo naglisod gyud ug tulog kay banha man kaayo ko hangtud niundang na lang mi kay ugma na pod magtiwas.

Alas 10 sa buntag ang among sabot nga magkita pero sayo kaayo mi nimata ni Ricardo kay manglarga na iyang anak ug apo, magdungan pa daw mi ug pamahaw before sila molarga. So mga past 10 nagkita na pod mi. Sugod dayon mi ug baktas sa Las Vegas Strip, posing didto posing diri among trabaho. Nakabantay mi nga kada posing namo, manghunong pod ang mga tawo kay aron dili sila maapil. Morag gibati mi ug kaulaw pero si Weng pa, "Wala bitaw sila kaila sa ato Beth, hehehe!" Ingon ko nga, "Sige Weng mag-thank you na lang dayon ta sa ilaha igkahuman, hehehe!"

Daghan gyud kabuang sa Las Vegas. Sin City gyud :) Left and right ang mga ads about "hot babes". Samtang nagbaktas2x mi naa poy mga lalaki nga naa sa kilid sa dalan manghatag ug mga picture sa mga babaye nga hubo gyud with contact number, picturan unta nako pero lain gyud kaayo tan-awon, as in nagtikangkang gyud, gipakita ang mga dughan pero naay mga star nga nakatabon kintahay sa mga angay tabunan nga part sa lawas pero ngil-ad lagi kaayo tan-awon. Pag maglakaw ka, nagkalat ang mga picture sa dalan gyud, gipanglabay ra pod sa mga tao nga ningdawat.

Daghan pod mga nakacostume nga tawo like kanang showgirls nga naa sa picture, spiderman, mascot, robot, etc. Maghatag lang ka ug tip kung gusto ka magpapicture sa ilaha. Ingon lagi namo ni Weng nga pwede pod mi makakwarta diay, magsuot mi ug costume ni Darna, hehehe!

Daghan mi picture pero bisitahi na lang ang album ni Weng sa Facebook kay dili makaya ug post ngari sa kadaghan. Anyway, sa kataas sa baktasunon, wala gyud namo gitiwas ug baktas uy kay kapoy na ug gutom pa gyud. Ambot lang kung nakatunga ba mi sa baktasunon sa side paingon sa tuo gikan sa among hotel nga gi-stayhan. Dili makaya nga baktason ang Strip ug isa lang ka adlaw kay kapoyan gyud ka. Pag-abot namo sa MGM Hotel and Casino, nanulod mi nangita ug monorail station kay mamalik na mi sa agi aron makalunch mi sa Harrah's kay naa silay Lunch Buffet nga naa sa among hotel coupons booklet. Nalipay kaayo mi nga manakay ug monorail kay aron maka experience pod mi, hehehe!

Pag-abot namo sa Harrah's lipay na mi kay makakaon na. Ngeek, kinataasan ang linya sa tawo!Morag paingon sa sinehan nga ang showing si John Lloyd Cruz ug Angel Locsin ang bida, hehehe! Naay express lane pero magbayad ka ug $5.00, siyempre wala mi didto nilinya, actually, wala gyuy nilinya didto, hehehe! Mga tunga siguro sa oras among nilinyahay. Duha kabuok ang linya. Ang isa ka linya para sa pagbayad ug ang isa para makakuha ka ug bakante nga lamesa. Ingon lagi ko, "Mokaon gyud ko ug daghan karon kay gutom kaayo ko!" Aw, sa walay lipod2x, daghan gyud koy gikaon. Kanang naa sa picture first plate pa na, nakatulo baya ko, hehehe! Morag nakaduha ra ug plato si Weng :)

Pagkahuman nibalik mi sa Hotel kay magrest kay busog gud kaayo.  Nagcall si Ricardo sa Airlines kung unsa oras ang flight namo kay open man ang among ticket. Mouli na mi pagkaugma kay si Ricardo mag attend pa ug safety class sa Thursday. Alas 6:05 sa buntag among flight so napugos mi pagtulog ug sayo kay sayo pa man mi momata. Wala na gyud mi nagkakita ug utro ni Weng. Wala man lang mi naka goodbye ug formal :(

Pagbalik namo sa Reno, ingon ni Ricardo nga among pasuruyon sila Weng ug John karong summer ug mangadto daw dayon mi sa Lake Tahoe. Siyempre dako kaayo akong ngisi.

So basin naay part 3 ning akong blog about sa among pagkita ni Weng, hehehe! Depende sa ilang duha kung ganahan mosuroy sa Reno.

Hinaut unta :)

Dear Mr. President MTV

Grabe, nitulo akong luha ug sip-on ani nga video.

Wala lang, ako lang ni gi-share.

Salamat sa paghapit.

Nakapamalandong Ka Na Ba?

Ako kining kinutlo gikan sa akong maidlot nga higala nga si Ate Inday Abaps, hehehe! Hinaut unta nga nakapamalandong usab kamo sama kanako.

Hangtud sa sunod natong pagkukabildo.

Amping!

Nagkita ra Gyud!



Si Ricardo, ako, si Weng ug iyang bana, si John

Human sa pila ka bulan nga pinaabot, nagkita ra gyud mi ni Weng diri sa US :) Ug hugot gyud kaayo among mga gakos intawon sa kahinangop, grabe, hehehe! Mora mi ug mga bata nag-ambak2x ang ngisi abot sa dunggan, hahaha!

Morag tanan nako nga mga friends sa Facebook nakaila gyud kang Weng. Pero sa wala nakaila, ako ta mong saysayan sa among kagahapon (kagahapon man gyud, hehehe) Ako na siyang "classmate" sa Lexelcom Cafe ug sa CJ's Cafe. Abtik kaayo mi magpareserve ug computer dayon kung kinsay makauna. Unya ipaila-ila pod taraw namo ang usag-usa sa cam ngadto sa among kachat unya kung kintahay mo excuse siya sa iyang ka chat, iya ko pa-chaton kadali (kay kaila na man pod kintahay nako), while tua siya sa CR. Taga Lapinigan ni siya ug usahay magkasakay mi sa bus uban pod sa iyang mga silingan nga mga amiga pod nako, pauli nga tungang gabii na kaayo gikan nagchat. Wala kaayo mi nagkadugay ug classmate ni Weng kay nakauna man ko ug ari sa US pero every now and then gachat gyud mi.

Ang akong dili malimtan nga among kaagi kadtong nagpakyaw mi ug motor paingon sila sa Lapinigan ako pod sa San Isidro kay morag dugay pa man yata molarga ang bus. Sa dihang naa na mi sa unahan ila Lademora, naflat ang ligid sa motor. Nagproblema mi ug masakyan, naghulat2x mi basin naay molabay among parahon. Ug pagkataud2x naa nay bus gipara nila, dili pa gyud ko mosakay unta kay maulaw ko mopara kay San Isidro ra lagi ko, duol na lang gud,  pero gipugos gyud ko nila, hehehe! Nahadlok gyud ko ato nga time kay gabii na kaayo gyud. Mirisi lagi kay nagpagabii. Morag dili man gani to gabii, kadlawon na gyud. Kini laging naningkamot nga makakita ug maayuhon, hahaha! Dili gyud ko maulaw kay mao nay tinuod.

So anyway, kaluoy ni Lord, nakakita gyud tuod mi ug maayuhon mao nga naka anhi mi sa US ug natayming pod kay silingan mi ug State. Silingan pero pirting layua. Kung magdrive mi gikan sa Winnemucca mga 16 or 17 ka oras ang among biyahion. Mao nga nalipay gyud ko nga nagkita mi kay bisag silingan ra nga matawag, dili basta2x ang among distansiya. Limitado ra man ang among pagtsika kay mobalik man dayon sila kay work man sa iyang bana pagka ugma pero nagsabot mi nga magkita mi sa Las Vegas one of these days, yeheey!

Sa sunod na ang sumpay ani, igkita namo pohon :)

Salamat sa paghapit.

Pagkapait nga Kahimtang!

Kinuha ni nga piktyur gikan sa Facebook

Haaay... mora gyud ug hilapon/kumuton akong dughan kada tan-aw nako ani nga piktyur. Ako man gyud ginatutukan kay gusto ko makabalo kung mga Pinoy ba ning mga bataa ni. Sigurado gyud hinuon ko nga Asian sila.

Intawon pod nganong wala man gyud ni giayo nga tulay! Daghan gyud kaayo mabasol kung naay mahitabo sa mga tawo o mga bata samtang nitabok anang tulaya na, pastilan. Ang gobyerno, ang mga ginikanan, ang principal sa eskwelahan, taga simbahan ug uban pa nga lider sa kumunidad mao gyuy dapat manubag. Ang gobyerno kay naa sa ilaha ang gahum sa pagpa ayo anang tulaya na. Dapat pod unta ang mga ginikanan mismo aning mga bataa ang mangita ug paagi nga moreklamo sa gobyerno aron ayuhon, o kaha ang School Principal unta nilihok pod, hasta ang taga simbahan isip miyembro sa maong lugar.

Nakaagi man gyud ko ug grabe kalisod tung elementary pa ko kay pero mas grabe man gyud nang experience sa mga bata kay kaduha gud sa isa ka adlaw sila motabok anang tulay times lima ka adlaw (Lunes-Biyernes), para sa ako morag between life and death na man na uy. Nahuna-hunaan pod nako karon nga basin kana ra pod nga time nga naingon ana na, basin pod ug maoy pagkaguba ana nga adlaw tapos kinahanglan gyud nga mouli sila sa ilang mga balay siyempre bisag delikado nilatas gyud, maayo unta ug ingon ana ang nahitabo. 

Pagkaluoy na lang gyud aning mga bataa ni. Hinaut unta nga ilang himuon nga hagit ang ilang kasinatian para magpabilin ang ilang pagpursigi sa pagtuon hangtud makahuman.

Salamat sa Ginoo kay swerte pa diay ang akong mga anak, ang akong mga pag-umangkon, mga anak sa akong mga amiga ug silingan ug uban pa kay dili na sila kinahanglan molatas sa walay klaro nga tulay o hanging bridge nga gubaun! Salamat Lord!

Magdula Ta!

Nakita ra nako ni nga pktyur sa Facebook, salamat sa tag-iya

Hala uy, dugay2x na man diay nga wala ko kapost aning akong binisaya nga blog! Tsk tsk tsk! Nagkabusy kintahay ko, hahaha!

Magkukabildo ta mahitungod anang piktyur, pastilan, haskang ka enjoy sa mga bata, o! Maayo kaayo nga pagkakuha sa ilang mga aksiyon, kita pod nga nagtan-aw morag maapil pod ta ug ka enjoy. Bilib ko anang mga bataa na kay nagdula pa sila ana. Basin didto na sila nagpuyo sa bukid nga walay TV ug Internet, hehehe! Namasin lang ko ba :)

Nahinumdum na nuon ko sa akong mga kaagi niadtong bata pa ko nga magdula ug chinese garter, tumba-lata, siyatum, tago-taguay, sungka, holen, takyang, ug kana pa ganing dulaon kung bulanun, unsa na nga dula nga naay libotir? Ug uban pa nga mga dula nga dili na nato makita nga dulaon pa karon nga henerasyon. Karon wala na gyud nauso tungod sa PSP, DOTA ug uban pa nga dula gamit ang computer ug Internet.

Pero sa ako nang gihisgutan sa unahan, bilib ko anang mga bataa sa piktyur kay makabalo pa modula ug "luksong-tinik", hehehe! Maayo na ipakita sa atong mga anak, pag-umangkon o kaha mga apo nga mao ni ang isa sa mga sikat nga dula kanhi, o di ba?

Na hala mao lang to, kita-kits na pod ta sunod. Ayo-ayo!