Ang Adobong Isaw, Bow!

Para sa uban nga dili mokaon, ngilngigan ug luoran gyud sila igtan-aw pa lang sa hulagway pero kadtong kumakaon makaingon gyud ug "wow, kalami!" 

Naay nakasulti sa ako nga Pinoy nga naa daw baligya nga laman loob sa Walmart, Rumba daw ang name brand mao nga nangita dayon ko, naa gyud tuod! Nakapalit ko ug duha ka putos nga tinai, ikog ug tualya sa baka. Ang ikog ug tualya para sa akong lutuon nga kare-kare pohon. Siyempre dili ni dapat himuon natong regular nga pagkaon kay basin ug masakit na nuon ta ug mahinungdan nga mapondo atong edad. 

Nagluto ko gabii akong giparesan ug inom ug red wine ug lipay kaayo ko nga nagsima-sima pero ang dagway sa akong bana kataw-anan, hehehe! Makita gyud nimo nga morag giluod, hahaha! Nireklamo intawon siya nganong sa kadaghan pwede nako lutuon ug isud-an, kana pa gyung "gut" kuno, naa man unta daw budget para sa maayo ug lamiang pagkaon.

Natughan na gyud ko sa kamingaw nako ani nga klase nga pagkaon, maayo unta sa sunod naay mapalit ngari nga guso kay mopalit gyud dayon ko. Guso ang akong pinakagikamingawan gyud.

Salamat sa paghapit ha, sa sunod na pod natong kukabildo. Amping!

Bechay

Sunog!

Dako akong kalisang sa dihang nakadungog ko ug kalit nga siyagit ug gisundan sa kusog nga usig sa mga iro sa among silingan. Pirti ka hilom ni nga lugar ug dili pwede nga dili madunggan ang gamay nga kasikas mao niandar gyud dayon akong nerbyos! Wala ra ba si Ricardo kay nagtrabaho!  Wala pay isa ka minuto nadungog na dayon nako ang wangwang sa Pulis ug sa Firetruck. Ug nisilib dayon ko sa bintana kung unsay nahitabo ug maoy nakita nako ang sakyanan sa Sherrif nga nagpatunga sa dalan with blinking lights on.

Nidali2x ko ug gawas ug nakita nako ang itom nga aso nga gidala sa hangin gikan sa ika duha  nga balay sa tuo nga bahin sa among balay. Ug nakita nako ang isa ka fire truck nga nagpaingon didto. Dali-dali ko ug ilis, gisiguro nako ug kuha akong bag, mga documents sa akong citizenship ug ang mga travel docs sa akong mga anak! Dayon gi-off nako ang heater, computer ug uban pa! Nagkurog2x na ko ug sugod! Gikuha dayon nako ang yabe sa akong sakyanan aron isiguro ug sulod didto ang mga importante nga butang! 

Paggawas nako, naay mga tawo sa gawas sa ilang isig-kabalay ra pod nag tan-aw. Pulos ra gyud mga firemen ug Pulis ang naa didto sa nasunogan, walay pwede makaduol. Ang fire hydrant sa tugkaran sa among balay maoy gigamit sa mga firemen ug hadlok ko mokuha ug picture sa ila kay basin bawal. 

Nitawag dayon ko sa kang Ate Cecilia sa Winnemucca kay aron naa koy mastorya kay niatake na gyud akong nerbyos, nagkurog na akong tibuok lawas. Maayo na lang nianam-anam ug pagkawala sa dihang nakita nako nga under control na ang sunog. 

Salamat sa Ginoo nga wala ra nikanat ang kalayo! Ug salamat sa mga firemen volunteers! Diri sa US kasagaran volunteers ra ang mga firemen ug kung molihok pinaabtik gyud kaayo lupig pay sweldado. Hurot akong bilib sa ilaha. Good job kaayo.

Kining hitabua nagpabalik sa akong galamhan tung nasunog among tapahan  nga naay sulod mga lubi, 19 na ka tuig ang milabay nga nagpakurog sa akong kuku (chin) ug tibuok kalawasan.

Anyhow, sa makausa pa, Praise God kay naundang na ang kalayo ug walay kinabuhi nga nakalas. 

Salamat sa paghapit, kita-kits ta sa sunod ha? 

Babush!