Wednesday, December 5, 2012

Walay Suot2x Ug Panty, Kaya Na Nimo?

This photo is grabbed from Google- Hinulam ra ni :D

Ako gyud ni gi-blog kay morag shocking ni siya para sa ako, para sa ako lang ha? Ug morag gilukan ko mag-huna2x man gud ug medyo weird pod, hehehe!

Naa koy kauban sa work (bag-o nako nga trabaho) nga dalaga pero naa siyay kalive-in, Italian-American siya, medyo chubby pero naa siyay hawak, as in okay pod iyang porma sa lawas. Ug grabe ka-igwad ug lubot, morag bola. Isa ka kadlawon nangadto mi sa Walmart kuyog namo isa ka Pinay nga kauban pod namo sa work. So samtang naglakaw2x mi, nakalabay mi sa section sa bra ug panties. Iyang gikomedyahan among isa ka kauban nga paliton to kay bagay sa iya. Nikatawa ra among kauban. Ingon ko, "Nope, I don't think she would buy that. She wears expensive underwear like Victoria's Secret". Iyang tubag, "Well, at least I save a lot of money because I don't wear panties!"  

Super nashocked akong beauty pagkadungog. Pa-effect lang ko nga wala ko nashocked, ako siyang gipangutana, "Do you itch when you wear panty? I heard that there are few people who can't wear panty because they itch and it would just cause infection down there". Iyang tubag, "No, it runs in my family. My mother and father don't wear panties too". As in seryoso gyud siya! Wala ko kabalo sa akong itubag pagkadungog nako sa iyang tubag, hehehe! Shocking to the highest level, hahaha! Kay kaila man gud ko sa iyang Mama ug Papa. Kauban pod namo, hahahaha! Di ba naay tawo nga dili makasuot ug bra kay mangatol unya naa poy uban nga igmatulog dili pod magpanty kay igangan ug dili sila komportable, pero karon pa ko kadungog nga sukad2x di jud magpanty! Unsaun na lang kung naay "mens"? Gusto nako siya pangutan-on pero wala na lang kay basin mahalata ko, hehehe! Ako na lang gihuna-huna nga basin magsuot ug tampon instead nga napkin kung mag mens. Pero sa akong pag-imagine sa tampon nga ipansak, ayayay, kagil-as ba! Hahahaha!

Karon dili gyud nako mapugngan nga mamuot every time makita nako silang tulo labina iyang Papa, hahaha! Aguy morag dili nako makaya nga maglakaw ko nga di magsuot ug panty, basin sige ra ko utot tungod sa panuhot, hahahahaha!

Kamo, kaya na ninyo?

Salamat sa paghapit :D Sa sunod na pod natong kukabildo.


Sunday, October 28, 2012

Ug sa Dihang Gidudahan Mi!


Kusog kaayo ang hangin niadtong mga pipila ka adlaw mao daghan kaayo mga bisag unsa na lang nga mga sagbot, basura ug uban pa nga napalid sa palibot sa among balay mao nga gi-operasyunan namo ug pamunit ni Ricardo, gikarga namo sa iyang van nga edaran na pod liwat niya :D



Pagkahuman namo ug pamunit among gihatud sa basurahan unya nagdecide mi nga moderetso ug town kay naay paliton. Akong plano gyud nga mosimba ko pagkahuman ug magluto  ug madala sa simbahan kay naay kaon after sa simba didto ra pod sulod sa simbahan. Kining akong kurdapyo nga maidlot daghan pod diay plano nga adtuan like didto mi sa storage kay naay kuhaun, unya niadto mi sa balay sa iyang amigo nga nidagan pagka commissioner sa town, (kanang nakapilit nga ngalan sa sakyanan) unya sige pa storya nalangan na mi plus niadto pa sa laing tindahan nagpalit ug iyang masuot nga underwarmers kay tingtugnaw na man lagi.

So morag di na gyud nako maapas nga mosimba ug magluto pa kay pasado alas kwatro na unya ang simba magsugod ug alas sayis. Nakahuna-huna ko nga magbuy na lang ug cake unya akong i-drop off sa church kay nag signed up man ko last Sunday nga dessert akong dalhon. So nagbuy mi ug duha ka klase nga cake.

Hapit na gyud alas singko, nihapit na mi sa simbahan. Tan-awon sa gawas morag walay tawo, ninaug ko ug akong gituyok ang knob, naka-locked. Niadto na pod ko sa pikas sa door, locked japun. So hulat2x lang mi sa atbang sa simbahan. Niingon ko kang Ricardo, "Mahal, how about if I will knock on the door of that house across the street to leave the cakes then I will send a message to the Pastor's wife's Facebook to inform her?" Ang iyang tubag, "Mahal you can't do that here. You don't know them." Akong tubag, "Okay, so we will stay a little bit then."

Morag dugay2x na gyud mi ug standby didto, ako nagkabusy ko sa akong cp, nagtry ko ug online kay magdula ug Words with Friends. Pipila ka mga minuto nilabay, mga 15 minutes, di na man mi kahulat, akong giingnan si Ricardo nga moadto mi sa among dati nga balay kay naa koy morag na-amiga na sa church nga taga didto, tigulang nga babaye, akong tawag sa iyaha, Ms. Barbara. Wala ko kabalo sa iyang address pero nakadumdum ko sa color ug hitsura sa iyang sakyanan, basin makita namo nga nakapark sa tugkaran so among tuk-tukon. Nisugot pod si Ricardo. Gipaandar na niya ang sakyanan.

Paglarga niya, naay Police car among kasugat, ingon pa gyud si Ricardo, "Here comes the Police"...  Ako kita pod ko sa police unya nagkabusy na pod dayon sa phone. Kung makasugat ko ug sheriff or police car, moingon ana pod ko. Ug sa pipila ka segundo, nalisang ko pagkadungog sa gisulti ni Ricardo, "How come we are pulled over by that Police?" Pagtan-aw nako sa among likod, tua na, nagkidlap2x na ang suga sa patrol car. Nibalik diay sa agi ug gisundan diay mi. Akong gitan-aw kung nagseat belt ba mi duha ni Ricardo, nagseatbelt man, akong huna-huna, "Unsa may violation nga nahimo ni Ricardo?!"

So nagpaingon na ang Officer sa sakyanan, naghulat mi. Ug sa dihang naa na siya tungod sa bintana sa side ni Ricardo, niingon, "Sir, somebody called the authority that you two looked suspicious sitting in front of the church." Kalma ra ang tingog sa Officer. Mora ko ug kakuyapon naminaw pero ako lang gyud gipugngan! Mao diay nibutho ang Police kay kami man gyud diay ang tuyo! Kalma pod ang tubag ni Ricardo, "We did?" Gidali2x dayon nako ug kuha ang cake sa akong tiilan ug akong gi-explain sa officer nga nagpaabot mi kung naay maabri na ang church kay aron ma drop off namo ang cake. Wala na katingog si Ricardo kay ako na may nakig istorya sa Police! Ingon ang Police, "When I saw you both, I didn't think you were bad guys"... unya nikatawa pero unsan man trabaho man daw niya. Haaay... nakaginhawa gyud dayon ko ug dako! Pastilan!

Paglakaw sa Police gihagad na nako si Ricardo nga manguli na lang mi ug kaunon na lang ang cake, hehehe pero agian na pod namo ang simbahan kay basin abri na. Pag-abot namo sa simbahan, naay mga tawo sa balay atbang, nanulod dayon sila unya pagliko namo para makita ang isa ka door, nakita namo ang asawa sa Pastor naghakot ug mga foods gikan sa ilang sakyanan! Nalipay ko! Pagnaug nako sa sakyanan, akong gitan-aw ang balay sa atbang, namuot ko kay nanilib sila sa screen sa ilang pultahan, hahaha! Grabe gyud nakong katawa!

Gi-storyahan nako ang asawa sa Pastor ug pirti pod katawa, hehehe!

Pandamay nga German chocolate cake ug red velvet cake!

Anyway, pagpaingon namo pauli na, ingon ni Ricardo, nga sa sunod daw gani, pa-storyahon pod daw siya, kay wala na daw siya katingog dayon pag sugod nako ug storya, hahaha! Ako pod siya giingnan nga tungod na sa iyang sakyanan nga morag pang-"kidnapper" ang hitsura, mao nga we looked suspicious, hahahaha! Pirti pod niyang katawa! :D

Nakita na man ninyo ang hulagway sa iyang van, agree mo no nga morag pang-"kidnapper" no? Kana nga van, gihatag ra na sa iyang Mexican friend kay ang iyang friend, nagbuy ug shed unya gipakapin sa tag-iya ang van, daghan man siyay sakyanan nga pareho ra ug edad sa van, mao iyang gihatag kang Ricardo. Si kurdapyo nipahalipay ug $50.00 pinugos gyud kay dili halos dawaton. Bisag mao ra na ang hitsura sa van, bag-o ang engine ana kay gigastuhan gyud na ni Ricardo ug almost $2,000 pirti nakong laguta kay dili worth it ang dagway, hehehehe!

Na hala mao ra to kay morag nagtaas na ang atong kukabildo :D

Salamat sa paghapit!



Sunday, October 7, 2012

Ang Basurahan Ngari

Magkukabildo na pod ta!

Naka-blog na man ko mahitungod sa basurero, karon ang akong i-share ang basurahan ngari. Tanan balay nagbayad gyud ug serbisyo sa tighakot ug basura kada bulan pero pwede pod nga ikaw mismo maoy molabog sa imong basura didto sa labayanan gyud mismo labina kung daghan kaayo imong ilabayay unya dugay pa ang sked sa basurero. Kaisa ra man kuhaun ang basura sa isa ka semana. Tung didto pa mi sa duol sa lungsod, kadaghan na nga higayun nga hagaron ko ni Ricardo nga mokuyog maglabog sa mga basura, kanang gikan siya maghinlo sa garahe pero di gyud ko mokuyog kay pagtuo nako baho kaayo didto, daghan mga langaw ug uban pa.

Nasayop ko kay dili man diay mao akong huna-huna. Tung nakabalhin na mi ug balay, malabyan na namo ang crossing paingon sa dumpsite. Isa ka adlaw gihagad ko ni Ricardo nga maglabog sa mga karton ug uban pa pagkahuman namo ug pangplastar sa mga gamit sa balay. Nisugot ko naluoy na ko sa akong bana nga himos ra ba kaayo ug tingog mohangyo, hehehe!

Mao ni ang mga hulagway:


Moagi sa gyud ka sa ilang opisina. Mao na ang sakyanan nga among gisundan. Natingala ko nganong nihunong man ug mga pila ka minuto. Ay, kay timbangon man diay ang sakyanan sa naa pay sulod ug paghuman na pod ug labay, mobalik na pod para timbangon utro, i-minus ang timbang sa sakyanan, ang mabilin mao na ang timbang sa basura nga imong gidala. Sa ani nga paagi daw mabal-an kung pila ka tonelada nga basura ang gilabay anang adlawa. Maayo pod no?


 Basaha na lang ang nakasulat sa paskil :)

 Paingon na mi sa timbangan, ambot asa ang timbangan diha hehehe, nalipat ko ug kuha sa hulagway.

 Ang opisina. Tigulang nga babaye ang nagbantay. Nag ask siya kung unsa among ilabay. 
Pagkahuman iya na mi giingnan kung asa mi dapat moadto.

Naa poy speed limit no? Kinsa kahay mopakusog ug padagan, hehehe! Naay mga paskil kung asa dapat ilabog depende sa imong dala nga basura.

Ang dako nga mamang. Lain man iyang ligid, unsa kahay iyang trabaho ana.

Niay pay isa ka dako nga mamang. Mao siguro nay tigtapok sa basura.

Mga napislat nga plastic butanganan ug tubig. Andam na para recycling.
Morag kadtong isa ka dakong mamang siguro ang nagpislat sa mga plastic no?

Pundok sa mga guba nga washing machines, dryers, refrigerators, freezers ug uban pa.

Ang view pasulod/pagawas sa basurahan, paingon na sa gun range ang dalan sa unahan.

Kung hagaron ko utro ni Ricardo maglabay ug basura mokuyog na ko kay okay ra man diay kaayo, morag dili man basurahan sa akong panan-aw, hehehe!

Morag nakaadto na pod mo no? Mao na ang basurahan sa among bukid. Salamat sa pagkuyog :)

Mao ra to. Sa sunod na pod nga pagkukabildo. 

Daghang salamat!

Wednesday, September 5, 2012

Akong Trabaho Tung-una

Pakigkukabildo sa mga ginikanan sa Lapaz, Agusan del Sur

Pakigkukabildo sa mga ginikanan sa Veruela, Agusan del Sur 

Ako ug akong Boss pauli na gikan sa San Marcos, Bunawan, Agusan del Sur (lugar ni Lolong)

Posing2x kay nindot ang view sa Langasian man yata ni, sa La Paz, Agusan del Sur

Ako, akong Boss ug ang Municipal Population Officer sa Esperanza, Agusan del Sur

Sa opis nagtinapulan

Sa opis gihapon, lipay kaayo nga nakadawat ug roses gikan kang Ricardo

With Tata Dingding, my former co-worker, posing sa before maglecture sa mga students

Haay, gimingaw na gyud ko sa akong trabaho tung-una sa wala pa ko niari aning lugar sa mga ugis, feeling nako fulfilled kaayo ko that time, feeling nako mao gyud to ang akong "calling", hehehe!

Plus ganahan ko kay klase2x akong means of transportation, magsakay ug Bachelor, tricycle, motorsikad, habal2x, paypag, pumpboat or bangka ug naa pay higayon nga nagbaktas ug pila ka kilometro. Naa man mi service taraw, L300 Van nga sige ra kadaut ug kung dili man gani daut, panghi-way lang taman kay basin ug madautan sa dalan unsaun na lang labina in the middle of the jungle. Aguy.

Usahay makahigda sa maayong higdaanan, usahay sa kwarto nga daghan lamok, usahay sa katre nga guot. Usahay makaligo  ug tarong ug usahay basta lang mahugasan ang angay hugasan, hahaha!

Uy, in fairness kasagaran makakaon ug lamion labina kay presko ang mga utanun pero naa poy higayon nga magpalit na lang mi ug pan isa ka putos sa tindahan.

Klase2x nga mga tawo ang mahimamat... bata, tigulang, pulitiko ug ordinaryo. Usahay daghan kaayo motambong, naa poy higayon maihap ra pod sa tudlo kay tua kasagaran sa uma nananum.

Enjoy kaayo ko kung adto mi sa school kay makarelate ko sa mga estudyante kay naa man pod koy mga anak nga pareho nila ug edad. Kada adto nako sa school, ma-appreciate gyud nako ang ilang katawa ug agik-ik ug bahakhak sa among topic about love, crushes, etc. "It's nice to be young" gyud dayon akong drama, hahaha!

Bisag miagi ug kalisod, kalisang (pagsakay sa atubangan sa  driver sa habal2x) ug kahadlok kay usahay magabhian sa dalan, wala gyud nisantop sa akong huna2x nga maayo pa moundang na lang. Makita sa piktyur nga all smile kaayo ko, mao nay nagpamatuod nga nagustuhan nako akong trabaho, hehehe! Kuntento kaayo ko sa akong trabaho kaniadto. Para nako, isa to sa pinaka the best nga adventures nako.

Wala lang, gishare lang nako, hehehe! Pawala sa kalaay ning kahapunon diri sa lugar nga banyaga.

Salamat sa paghapit, kita kits sa sunod!


Tuesday, September 4, 2012

Magtanum Ta ug Tanglad or Lemon Grass!

Sayun ra man diay magtanum ug tanglad!

Matud pa sa akong nabasahan, ihumol ra daw sa tubig ang tanglad nga pinutlan na ug dahon ug kuhaan ug medyo gulang nga paklang ang punuan, alisdan ug tubig kada buntag hangtud nga motubo ang ugat ug pwede na dayon itanum. 

Ako dayon gitestingan kay tayming naa koy tanglad sa ref salin sa pagluto nako ug ginat-ang tahong niadtong niaging bulan. Kaysa madaut pa, ako dayon gihumolan.

~Permiro nga Adlaw~
Mao na ang hitsura
~Ika-unom nga Adlaw~
Naa nay ugat nga nitubo ug naa nay nisiwil nga saha
Ug naa nay dahon nitubo sa pinutlan
~Ika-walo nga Adlaw~
daghan na ugat
ug nitaas na ang dahon sa pinutlan- pwede na itanum!

~Gitanum dayon nako~


Syaro di pa gyud motubo nga naa nay ugat daan, hehehe! Sa pot ra nako gitanum kay aron mabalhin sa sulod karong winter, lisod na basin matuskig, wala ra ba ko kabalo kung perennial ba ning tanglad or dili :)

Maayong balita ni kay aron dili na ta magsige ug panikwi ug pangayo ug tanglad sa silingan, di ba?

Sige, magtanum na ta ninyong tanan!

Salamat sa paghapit!

Friday, August 24, 2012

Daghang Salamat Lord nga Buhi pa Ko!




Milagro ang nahitabo sa ako gainang palis, alas dos, Agosto 24, 2012. Salamat sa Ginoo! 

Mga 3-5 miles gikan sa among balay samtang nagdrive ko 70 miles per hour, nagtry ko mag-pass sa car ahead sa ako, "overtake" na sa ato sa Pinas, wala na nako nakontrol ang manibela ug nag ekis2x ang akong sakyanan sa karsada hangtud nahaadto sa bakanteng lupa nga natakilid na ang sakyanan. Hangtud karon klaro kaayo sa akong panumduman ang mga panghitabo. 

Paghunong gyud sa sakyanan, natakilid na ko kay natakilid na man lagi ang sakyanan, buak na ang windshield, nagkanat ang mga gamit sulod sa car, wala jud ko natarantar, akong gihuna2x nga i-off dayon ang engine, so gi-off nako unya gipangita dayon nako akong bag para kuhaun ang akong celphone kay aron tawagan nako ang 911 pero akong huna-huna nga basin masuffocate ko sa sulod, nangita ko ug malusutan, dili man ko kaagi sa bintana mao niadto ko sa likod ako na unta abrihan pero dili man maabri, kay pagun-locked nako para ma open, apparently, nalocked hinuon. Unya nakadungog ko ug tingog sa gawas nga gituktok ang car, nafeel nako nga naglibot2x sila sa car kay wala na man ko nila nakita sa driver's seat, dili kaayo nako madungog pero nitubag ko, "I'm here at the rear! Please help me open this door!" tapos gitry ug open sa gawas wala nila naopen so akong gipislit na pod ang lock mao nga na-open na kaluoy sa Diyos. Unya ang naa didto isa ka babaye ug duha ka lalake. Ingon ko, " I have to call my husband!" Pero kabalo ko nga dili gyud makamata akong bana tungod sa kakapoy, nagwork man siya last night ug ang cp tua sa kusina, wala gani siya kabantay nga niuli ko for lunch. "Are you okay?" Are you alone? Ingon nila tulo. "I am fine and yes, I am alone" ingon nako. "God is good to you! Look at what happened to your car! And you seems okay indeed!". Gihatagan ko ug tubig sa lalaki pero gihugasan sa ang akong samad sa kamot nga nahulugan sa buak nga bildo sa windshield, kanang naa sa picture, gisure kung lawom ba or dili pero dili lawom kay niundang ra man dayon ang dugo. Tapos busy na dayon sila ug tawag sa 911, gitabangan pa nako an babaye sa address dili man siya taga Nevada, taga Idaho. 

Nagtawag ko sa akong employer sa nahitabo unya gitawagan nako akong amiga. Kining akong cp, nasuya ko kay 3 days ago, nikalit lang ug kawala ang mga contacts gyud as in, deleted tanan so maayo na lang namemorized nako ang home phone sa akong amiga maayo na lang naa siya ug nakatubag dayon. Niabot dayon ang Police cars, Sherrif's car, ug ang Highway patrol car, ang ambulance with blinking lights, ug nanghunong ang mga klase-klase nga sakyanan. halos sila tanan nag ask kung nagseat belt ba daw ko, ingon ko, "Of course, I always wear my seatbelt before I drive". Maayo na lang daw gyud kay nagseat belt ko. So gistorya ko sa Highway patrol officer ug sherrif gikuha akong driver's license ug insurance unya giistorya na pod ko sa ambulance pipol. Tanan pangutana gitubag nako unya naa koy nadungog "She is alert and has presence of mind!" Unya naay nag-ask, "Are you the passenger?" Kay morag dili daw ako ang pasahero. Ingon ko, "I am fine for now, maybe later when everything sinks in, I don't know". Grabe sa akong pag tan-aw sa palibot kana ganing morag naa sa salida nga naay disgrasya, gusto unta nako picturan pero basin moingon sila nga naunsa man tawon ning bajiha ni nga nakahuna2x pa man ug kuha ug pictures mao wala na lang,gipugngan na lang nako akong kaugalingon. Pero tung nanghawa na ang tanan, duha na lang ang bilin, ang highway patrol officer ug sherkay nagtawag sa towing service, nagkuha dayon ko ug pics.

Before nilakaw ang babaye nga taga Idaho iya ko gi-hug, "I am glad that you are fine. That was a miracle. You should be thankful to the Lord. You take care always, ok?" Nagtahank you ko sa iya. Gi-hugged na pod ko niya utro. Unya nagpasalamat ko sa kadtong duha ka lalaki, wala nako nakuha ang pangalan sa babaye ug sa isa ka lalaki pero ang isa nakuha nako hasta iyang number, iyang pangalan kay Patrick Blake. Nagpasalamat gyud ko sa ilaha ug siyempre sa labaw nga Makagagahum.

Pag-abot sa akong amiga, gusto na dayon ko mouli, ingon ko sa h-way patrol officer, "Am I released now Officer?" Ingon siya nga yup daw pero iyang giexplain sa ako nga ang office niya maghimo pa ug further investigation, etc unya naghatag siya ug calling card unya nisulti pod siya kung asa namo makita ang car, kung kinsa ang mag-tow.

Pag-abot namo sa balay, gipukaw nako akong bana nga intawon naghagok pa sa katre. Pastilan. Unya morag wala siya kasabot sa iyang gibati. Maayo na lang wala ko na-hurt daw, ug maayo gani dako akong car kay kung gamay pa daw, badly hurt gyud daw ko. Iya dayon gi adto ang sakyanan, ingon sa tag iya sa auto shop dili na daw maayo, kibali bayran na lang mi sa insurance siyempre pinakabarato as in barato, para makadown mi ug laing sakyanan. Ug mag expect na lang mi sa pag increase sa among car insurance. Haay.

Anyway, kaluoy sa Diyos wala gyud ko nangurog as in wala ko narattle, natingala gani ko nganong wala gyud koy gibati, hopefully okey ra gyud ko, akong mga anak pirting kaguol intawon nagchat mi while nagtype ko karon. Basin daw ma-internal bleeding ko, intawon palayo pero maniid gyud ko, dili ko padoktor ngari kay basin mas madeads na nuon ko sa kamahal ug kay wala koy salig sa ilaha, adto na lang ko sa Reno deretso.

So, hinaut unta nga okey ra gyud ko. Dinhi lang taman kay maggrocery pa mi. Naa pa mi nabilin nga sakyanan duha kabuok pero hadlok ko modrive kay ancient na, pirti na gyud ka old so nitawag na pod ko sa akong boss nga di ko kawork ugma ug sa mga uban pang days kay wala koy car, nibalhin na man mi mga 9 miles from town so dili pwede magcab kay pirting mahala so balay na lang sa gyud akong beauty ani, ambot when mi ani makabuy ug car utro. Ingon ko, dili na gyud ko moovertake, imbis first time ever pa to nako nga pag overtake gyud since ko nagkalisensya, tsk tsk tsk!

Pero Salamat kaayo Lord sa bag-ong kinabuhi. Buotan kaayo ang Ginoo kay giprotektahan gyud ko.Mag-ignay na gyud ko sa sunod ug mag-ampo gyud pirmi labina before magdrive. Lesson learned.



Friday, June 22, 2012

Mag-plumber Na Lang Ko!



Pirti nakong pagkakurat pagkahibalo nako nga kung molapas na diay sa alas singko sa hapon unya manginahanglan ka ug plumber diri sa US kay kintahay naay emergency, sa pagtawag pa lang nimo, naa nay bayad. Grabe!

Naay balay sa isa ka Pinoy diri nga nagbaha na hapit ang ilang balay kay dili na mapalong ang tubig bisag unsaun hangtud nga nilapaw na ang tubig sa lababo. Ang anak ra nga bayong-bayong ang bilin kay ang amahan niuli man sa Pinas. Nagdali-dali dayon ko ug tawag ug Plumber unya naa na diay nakatawag, isa pod ka Pinoy, kibali sila na nagtiwas ug storya.

Pirting dalia ra kaayo naayo pero shocking ang bill kay $130.00! $120 daw ang charge sa pagtawag sa ila! Hapit nagisi akong baba sa kakurat! Tiaw ba! Mao nakaingon gud ko nga mag-plumber na lang ko, hehehe!

Haay, grabe, mabuang ko :)

Salamat sa paghapit.


Tuesday, June 19, 2012

Paghandum Sa Usa Ka Amahan


Grabe kahuot akong dughan karon ug walay hunong ang pagtubod sa akong mga luha pagkadawat nako sa subo nga balita nga nipanaw na ang isa sa mga hinungdan nga wala koy pagmahay sa akong unang kaminyuon; ang akong buotan ug mapinanggaon nga ugangan nga si Papa Tonyo Tiu (ug siyempre sila duha sa akong mother in law nga si Mama Elsa).

Kagabii lang nagplano ko maghimo ug blog about sa akong Papa Nanding, Papa Tonyo ug Daddy Ben in consonance with Father's Day celebration pero napending sa kay katulogon na ko. Pero karon akong gipadayon igo paghonor sa kang Papa Tonyo isip pinaka the best ug buotan nga ugangan.

Si Papa Tonyo usa ka buotan, mapinanggaon ug manggihuna-hunaun sa iyang mga anak. Nakadumdum ko nga tung una bisag naa na mi tindahan sa palengke (ilang hinatag ni Papa Tonyo ug Mama Elsa ang among pwesto with sulod na para sa amo) unya bisan naglain  na mi ug puyo, hasta sila Manong Bebot ug Helen (hinatag gihapon nila Mama ug Papa ang ilang pwesto), apil gihapon mi sa kwenta sa pagkaon, pahatdan gihapon mi ug pamahaw ug paniudto. Grabe namo kaswerte! Ug sa kang Papa gyud ko mag-ingon nga wala nay gatas si Jen-jen ug Jun-jun :)

Mahilig si Papa Tonyo magbasa ug newspaper nga Philippine Daily Inquirer ug kada gabii magbasa na siya. Nakadumdum ko nga nag asked ko niya unsay kalahian sa National Election ug Plebiscite? Ug iya pod gi explain sa ako, hehehe!

Man of few words si Papa Tonyo pero he had the biggest heart para sa iyang mga anak ug mga apo!

Daghang Salamat sa paghapit!

Sa sunod na pod nato nga Kukabildo :)
 

Wednesday, June 13, 2012

Ang Basurero, Bow!

Nakatayming ra gyud ko sa tig-kuha ug basura ngari pero dili ang tigkuha sa among basura. Duha man gud ang kompanya sa basurero diri. Ang among sked kay kada Lunes sa buntag sayo, dili pa mag alas siyete sa buntag so dili ko makatayming.

Ako ni gi-blog kay para sa ako interesting ni hehehe. Sa ato kay mabal-an nato nga moabot na or naa na ang basurero tungod kay baho man ang hangin nga atong masimhot pero ngari, dili baho, banha lang kaayo ang tingog sa sakyanan.

Naa mi ni Ricardo sa garahe, nadungog namo ang tingog sa basurero
gipiktyuran dayon nako

Sa atbang na ni sa among balay. Giguyod na sa tawo ang sudlanan
sa basura nga morag pinakadako nga balde sa ato with taklob.

Gitung-tung ang sudlanan sa basura unya naay
gibira ang tawo para matuwad

Human na nayabo ang sulod

Unya naa na poy gituyok ang tawo para makahig ang basura
paingon sa sulod

Morag wala lang pagkahuman nakahig

Nagpahanoy na si Ugis. Sa ubang balay na pod :)
Si Ricardo sige explain while gakuha ko ug piktyur.

Interesting di ba?

Salamat sa paghapit.


Wednesday, May 2, 2012

Armas: Legal Diri sa Nevada

Sa imong unang tan-aw pa lang sa piktyur, siguro ang unang misantup sa imong huna-huna is, "Sundalo siguro ang tag-iya ani.." Sayup ka kung mao nay imong pagtuo :) Kuyaw ang mga hobbies sa mga pipol ngari kay hunting, shooting, fishing, etc.

Ambot unsa ni nga mga armas- wala ko niduol gyud
kay naulaw ko sa tag-iya nga naa sa kilid

Doktor ang tag-iya ani. Asawa niya is Pinay. Kini sila nibalhin na sila ug Reno pero na-assign man si Doki sa Veteran clinic diri sa Winnemucca mao nibalik sila ngari, tayming pod kay wala nahalin ilang balay. Sa wala pa sila nibalhin, naay "roomfull" nga mga armas si Doki. Karon nisamot ug kadaghan. Kibali, kanang naa sa piktyur mao ray nauna ug dala. Naa pay duha ka dagko nga safe boxes nga puno ang sulod plus naa pay wala na naigo sa safe boxes.

Kining mga armas naa ni sa kusina dapit
mao nakuhaan nako ug piktyur isa2x :)

butanganan ug bala

nia pa gyud

Revolver? Tag-an2x ra ning ako :)

Naay flashlight nga pusil

kaluha? hehehe!

Naa pod silay hait nga sundang :)

Nahisgutan na man nako sa niaging blogs nako nga legal ang maggunit ug armas ngari, bisag isa pa ka balay sa kadaghan basta maayo lang imong record sa gobyerno, kanang ginaingon nga wala kay "felony" nga kaso sukad2x.

Morag sa paminaw nako, si Ricardo ra ang walay armas bisag isa, gawas sa iyang natural nga armas nga gidala-dala, hahahaha! Uy, dili siya '"felon" ha? Good boy ning akong ugis, hehehe! Tanan nga kaila nako ngari naa gyuy armas, mag-asawang kano man o ang asawa Pinay. Ingon lagi ko sa akong huna-huna, "Talawan man siguro akong bana, hahaha!" Ako gyud siya gipangutana, "Mahal ko, why don't you own a gun? You are the only person I knew in this place that has no gun. Yuny's husband, Ate Cecilia's husband, Randy, Mr. Dave, blah-blah-blah... They all have guns." Ang tubag, "I've been gone hunting before and I got very unhappy looking at the bloody elk lying in the ground breathless. I felt very sorry for the poor elk. Since then, I hated hunting. I hated guns." Hmm. Morag nakapoint pod siya gamay. Kibali maluluy-on kintahay siya, hehehe whatever...

Iya dayon ko gipakita ug mga videos sa YouTube mahitungod sa dis-advantages sa paggamit ug pusil. After pila ka adlaw, naa koy nabasahan nga news online mahitungod sa girlfriend nga napusilan sa iyang boyfriend ra pod kay na-alaan ug wild pig while naghunting sila. Nah mao na ni ron, naalaan man gyud ug wild pig, hahaha! Maayo na lang nadala sa hospital ang babaye ug wala na lang pod niya gikasuhan ang iyang uyab kay wala man daw gituyo.

Hay mao ra to kay medyo nitaas na ning atong pagkukabildo. Balik-balik ha?

Salamat sa paghapit :)

Saturday, April 21, 2012

Kamo Nay Mag-igo sa Title :)

Wala kaayo nakatulog akong pinalangga nga kapikas sa kinabuhi kagaina tungod sa kabanha sa palibot imbis pang night shift  siya. Ang iro sa among silingan sige usig, naay sakyanan nga gaatras-abante plus tingog pa sa chainsaw. Akong gisuta nganong banha man kaayo. Pag abri nako sa pultahan, pirting kanindot ang palibot, hayag kaayo ang kawanangan inubanan sa mga panganod nga nindot kaayo kab-uton (char, nagbalak ko? Hehehe!)  ug ang nagpanindot ug samot... dili tugnaw ang hangin nga midapat sa akong panit. Nakasmile gyud ko, sa akong huna2x, "Wow, hapit na gyud ang summer, salamat sa Ginoo!"

Ug mao ni ang nisugat nga beauty sa akong mga mata:

Ang maanindot nga mga bulak sa among tugkaran :)
Ug mao pod ni ang hinungdan sa kabanha:

Nagpa-"trim" diay ug kahoy ang atbang sa among balay
Sosyal kaayo ang mamutulay ug kahoy ngari :) Mao pirti kamahal gyud ang bayad.


Si Manoy Mexican sa ibabaw sa kahoy gamit ang chainsaw. Duha ra sila kibali nagtrabaho: kana si Manoy nga naa sa taas sa kahoy ug ang tig operate sa crane para ibalhin2x siya. Gamay ra gasto sa manpower no? Labina kung maghimo ug balay ngari, walay tawo kaayo ug pirting dalia ra mahuman. Naa koy mga pictures ngari kung giunsa paghimo ang balay pero wala pa nako nalugaran ug blog. I-post ra nako.

Mao na lang sa to.

Salamat sa pakipag kukabildo sa ako. Balik2x ha ayaw kaulaw kay wala ni bayad :)

Ang inyong higala sa laing dapit... Bechay