Friday, December 23, 2011

Ang Palibot Ug Talan-awon Nga Makaluya










Kagahapon giabot gyud ko ug hilabihan kamingaw.

Wala man untay rason pero nindot gyud kaayo iligid-ligid dala sikad-sikad, hilak, tiyabaw ug hagulhol tungod sa akong gibati nga ambot dili masabtan ug dili nako madescribe. Inshort, nindot i-wild nga walay hinungdan. Gipugngan na lang gyud nako kay basin matingala akong bana ig uli niya nganong natralala ko. Pero nakatulo gyud akong luha.

Kung magpamusic pod, makadumdum man pod ta sa mga kagahapon (kagahapon man gyud) ug kung motan-aw pod ko ug TV adto gyud dayon pilit sa TFC unya ang makita po halos mahitungod sa Pasko sa Pilipinas. Nah, makaibog ug samot. Ug kung tingbalita pod, i-feature pod ang mga nahitabo sa CDO, Iligan ug Dumaguete. Makahuot pod sa dughan. Haay. Wala gyud koy dag-anan.

Nigawas ko sa balay, nagdrive2x para malingaw. Unsaun pod nako pagkalingaw nga pirting mingawa man ang palibot intawon! Walang kabuhay2x ang mga palibot gyud. Ang mga punuan sa kahoy gaupaw lang ang agi, naay isa ka punuan nga medyo naa pay dahon gamay nga nangabilin pero yellow na pod ang color padulong na mangatagak. Unya pulos ra pod sakyanan imong makita.

Ug nia pa, sige, pasayluon na lang nako ang palibot nga grabe ka "dull", ang dili nako madawat ug mapasaylo ang hilabihang katugnaw gyud nga manuhot-suhot gyud sa akong kaugatan. Pirti man unta kasinag ang adlaw, as in gyud, pero limbungaros nga dako kay dili gyud nimo mafeel ang init. Ang katugnaw gyud pod ang hinungdan nganong patay ang mga tanum sa palibot. Kinsa man intawon ang maka-antus! Ambot nakaingon gani ko,"Asa na kaha karon ang mga mamang nitago? Hehehe. Kaluoy pod nila!"

Mao ni ang naka-apan pag winter, morag walay kinabuhi ang palibot. Makaluya. Ug nia pa, bisag walay snow, tugnaw gyud kaayo. Ug tungod kay tugnaw man, pakusgan gyud ang heater, siyempre kusog pod mokaon ug kuryente, pagkusog ang kuryente, mao nay giingon nga "hinay" ra ang bayrunon, hehehe!

Hay mao na lang sa to. Magkukabildo na pod ta sa sunod. Maayo ni nga kukabildo kay dili ta mangasamad :)

Babush...




Tuesday, December 20, 2011

Christmas Party Nga Naay "Emergency"

Pinay Beauties

Si Emy ug ang  "Hero of the Night" nga iyang bana, si Jerry

Gamay ra mi nga Filipinos diri sa Winnemucca, nianam na unta ug kadaghan pero namalhin sa lain State ang uban. Ang mga pipol man gud diri sa US kay kasagaran come and go.

Pero bisag gamay ra mi, bibo lang gihapon kaayo mi. Ana man gyud basta magkatapok lang unya naay Pinoy foods ug videoke, payts na kaayo. Although Pinoy Party ni siya, naa gihapon kano, well, gawas sa among respective husbands. Naa mi bisita nga ugis, babae siya. Kasagaran naa gyud siya sa Party labina tung si Rowena (among bisita sa party nga taga diri dati pero nimoved na sa Reno) pa ang host. Kadumdum ko nga ni-ingon niya nga mas ganahan siya mangamiga sa mga Pinoy kaysa mga puti.

So pirti namo kabibo gyud, naghuot mi sa kusina kay nindot ang music unya naa pod dito ang mga foods siyempre :) Sa sala naa didto videoke, mga wanggits ang naa didto nagkanta2x ug pang wanggits pod nga kanta, hehehe! Ug ang ilang audience mao ang among mga kabanahan, nagpitok2x ra ang mga mata morag mga mata sa kabaw nga bag-o lang nahalin, hahaha! Wala gyud silay tingog2x, naniid ra sa amo nga hala bisaya diri, tagalog didto ang inistoryahan. Kung sa tagalog pa, "Nakakabinging katahimikan" ilang drama didto, hehehe! Ambot pod nila nga pwede ra man unta sila mag storya2x kay magkasinabot gud sila.

Hangtud ang akong bana ug ang iyang bestfriend, nga bana ni Nathalie nananghid nga naa silay lakwon, mamalik ra kuno. Gilaay siguro. Sugot pod mi. So padayon ra gyud among kabibo. Posing didto posing diri, hahahaha didto ug hahahaha diri ang among agi. Kana man gung bading grabe ka himos mosayaw, mao sige ra mi katawa way limit gyud.

Didto ko sa sala sa dihang nakadungog ko nga naay nabuak nga baso dapit sa kusina. Abi lang nako ug unsa lang. Sus naniyagit na man sila. Pag-adto nako kay ang lady ugis kay mora na man ug statwa iyang porma! Nakadumdum ko nga nag-ingkod2x ra man to siya unta nag storya2x sa isa ka maas pod nga Pinoy, amahan sa Pari nga Pinoy nga na-assign diri tung-una. Hala, nipurple na man iyang dagway, nagsiga iyang mata ug iyang baba medyo nag nga2x. Nakasyagit ko ug apil pagkakita nako. Gipahigda. Gikuhaan ug pulso. Wala na daw. Nagpanicked na mi unsay buhaton. Tulo kabuok ang nakatawag ug 911 dayon. Nangutana ang dispatcher kung unsay address, kung unsay nahitabo, unsa, nag ginhawa pa ba ang pasyente, etc. Panan-aw ug paminaw nako, deadz na gyud si lady ugis. Actually, kami tanan maoy among pagtuo gyud. Pero ang bana ni Emy niperform gyud ug CPR (bless his heart!) unya naghinay2x ug lihok ang mga mata ni lady ugis. Pasalamat gyud mi sa Ginoo! Natingala siya naunsa daw siya. Was knowing daw siya.

Unya siyempre kay nanawag mi ug 911, naa na nakita namo sa glass window nga nipark na ambulance ug police car with flashing lights ( I'm sure natingala gyud ang mga silingan ato.) Dali ra kaayo niabot, mao nay akong gikabiliban ngari kay automatic gyud dayon. Pagkahibalo sa pasyente nga nagtawag mi sa 911, abtik pa sa kilat nga nagpabangon kay dili daw siya magpahospital. Kinamahalan baya ang hospital diri bisag naa pay insurance. Ang pasyente ra ba gyud kay bag-o lang nabyuda.

Nanggawas dayon mi unya giingnan dayon ang Emergency team nga naulian na ang pasyente. Abtik kaayo iyang mga sakop nga ipagawas na unta ang stretcher ug uban pa pero gisenyasan niya nga dili lang sa. Nisulod sila ug gipangutana ang pasyente. Tarong kaayo manubag si lady ugis morag wala siya niagi hapit nadeadz. Morag naulian na gyud nuon siya. Aron gyud masure nga okey na siya gipangutana siya, "Where do you live? How old are you? When is your birthday? Do you know where you are right now?" Pirting ka perfect iyang answer gyud. Ang sunod nga pangutana medyo "shocking" sa ako kay unexpected. "Who is the President of the United States?"  Hehehe, nakatubag gyud si lady ugis mao nga pagkahuman nanguli na lang ang ambulance people ug Police pero giingnan mi nga pwede ra sila tawagan anytime kung atakihon na pod ang pasyente.

Paghawa nila, nibalik ug kaluspad ug kaluya si lady ugis hangtud dili na siya kalakaw sa kaluya. Niadto siya sa CR gidayungan na gani. Dili gyud siya magpadoktor ug dili pod siya gusto nga pahibal-on iyang mga anak nga based na sa Reno kay dili daw siya gusto nga mabother pa sila, maghatag lang daw siya ug problema sa ilaha. Didto na lang siya gipatulog sa balay sa iyang pinakasuod nga amiga nga Pinay. Unya kami pod morag naluya na although gipadayon namo ang party pero lahi ra gyud sa kadtong pagsugod nga wala pay nahitabo.

Mao nga pagkaugma nagtapok2x na pod mi naghisgot sa nahitabo. Okay na daw si lady ugis. Giingnan mi nga na overdosed diay siya kay naa daw siyay maintenance nga medicine pero nakalimtan niya, iyang gitumar tanan to catch up. Unya kay 78 years old na man siya, wala na nakaya sa iyang lawas. Nagpabuyag ang tiguwang, hehehe!

Mao nga nadugay na pod mi didto hangtud naabtan ug alas 10:00 sa gabii, kibali 12 hours ko didto, pag-uli nakasuk-an sa bana, hahaha! Pero maayo na lang peace na mi :)

Na hala mao lang sa to. Matulog ko ug balik.

Kitakits ta diri sunod ha?

Salamat sa paghapit.



Monday, December 19, 2011

Ug Sa Dihang Nasuko Ang Akong Bana



Morag lain man ni siya i-blog no kay morag personal ra kaayo pero i-blog gyud nako ni kay dili ni basta2x nga panghitabo, char!, kay una pa ni nga higayon nga nasuko akong bana. Yup, first time gyud gikan sa among pagminyo, mo lima na mi katuig.

Niaso ang duha ka dunggan sa akong maidlot nga kapikas sa kinabuhi kay naglaag ko kuyog sa mga Pinay diri sa Winnemucca. Naa man mi amiga nga dati na taga diri unya ni-moved na sila sa Reno nibisita ngari kay ni-attend sa among Christmas Party pero wala man mi natagbaw sa Christmas party namo mao nag tapok2x na pod mi ug another day na pod sa pareho ra nga balay. Nagvideoke mi, nagdula2x ug tong-its, inom2x ug white wine ug nagsige ug katawa didto, katawa ngari. Grabe gyud kintahay namo ka enjoy to the highest level gyud.

To the highest level na pod diay ang kasuko sa akong bana kay gilaay diay siya diri siya ra isa sa balay. Abi gyud nako ug ok ra sa iya kay understanding man gyud kaayo ning akong bana intawon. Wala gyud ko kadungog nga nireklamo ni siya everytime magtapok2x mi sa akong mga amiga. Ganahan man gani na siya para dili pod ko mabored.

Pag-uli nako sa balay, tulog na siya unya andam na niya iyang baon, as in, kumpleto gyud, naa na sa ref ang iyang sandwich ug giandam na niya sa iyang lunch bag ang drinks niya para ice na lang ang ibutang good to go na dayon. So nag FB2x sa ko, akong gicheck kung naa ba koy message gikan sa akong mga anak, unya kay nakamata man na siya.

Hala kay nagyaw2x siya ug maayo sa ako tapos nireason out ko, ingon niya dili sa daw mi magtalk kay lagot daw siya, naghilum na lang pod ko kay medyo nikurog my heart pod ko kay first time ko kakita niya nga suko gyud siya sa ako. Sukad man gud nga wala na koy work, kami sa akong bana kapit-tuko gyud mi sa usag-usa, mag grocery, mag eat out, watch ug TV, bisan asa basta day off niya, ug we consider ourselves magbest friends gyud so naanad na siya sa akong presence mao siguro nga naglain gyud iyang buot.

Siguro napuno na gyud si Ricardo. Dili man pod nako siya mabasol. Kay tiaw ba nga nagsabot gud mi niya nga mamalengke mi duha unya nitawag pa gyud siya sa ako kay nibalik na pod si Brenda sa house, wala ko niuli pero niadto na lang ko sa ilang house kadali kay tayming silingan man sila sa balay nga among gitapukan, tapos wala pa japun ko niuli, nawag ko niya wala man ko niya gitubag, wala japun ko niuli kay naglami na man gyud mi didto, wala gud mi nag-inom ug makahubog kay magdrive baya, unsaun na lang kung masakpan sa Pulis, impas man gyud mi.

Upat siya ka adlaw karon nga day shift then 7 days off na dayon.Kung dili siya motingog nako ig uli niya unya, adto na lang ko matulog sa room sa akong daughter kay aron walay samok. Sa akong huna-huna, "Dah bahala ug masuko basta ako nalipay! Kadto ra pod gani nahitabo nga kumpleto gyud mi tanan Pinay ug naay Videoke pod."

Pero sa tinuod lang, nabag-uhan gyud ko kay wala ko naanad nga nasuko akong bana, nahadlok ko ba kay basin i-divorce ko, hahaha! Wala gud ta kabalo sa iyang huna-huna plus lahi baya na sila ug kultura. Aw kung simbako moabot mi sa ingon ana, moingon na lang siguro ko ug, "Okey fine, whatever!" Morag pod ko ug korek nga dili ra ba gyud, hehehe! Haay, nagsalimuang lang akong utok karon. Bisag unsa na lay nahuna-hunaan. Pero dili pod siguro ko niya  i-divorce uy! Kahilas niya kung i-divorce ko niya, hahaha!

Tayming nag online akong son sa FB so nagchat mi, nitug-an ko niya, nakuratan siya ug wala nakatuo kay kinabuotanan man gyud kaayo ilang daddy, grabe ka pasensyuso kaayo. Ingon niya bantayan nako ilang daddy kay basin maheart attack o kaha ma high blood daw sa kasuko. Nagguol intawon akong anak.

Unya ni makita ug masusi ig uli niya kung suko pa ba siya sa ako or dili na. Hala. Kung suko pa japun siya, mirisi gyud kong daku, hehehe! Mao nay giingon nga, "Tagam! Palabi pa!"

Bitaw uy, nakaingon gud ko ug, "Di na gyud ko moutro, kaisa na lang!" :)

Salamat sa paghapit ha. Magkukabildo na pod ta sunod.



Tuesday, December 13, 2011

Bad Kaayo si Ako


Thanks to the owner of the photo
Karong hapon, igo nilakaw akong bana paingon sa work, naay nanuktok. Talagsaon ra nang manuktok kay naa guy doorbell. Nagduha2x ko ug abri sa pultahan kay wala pa koy ilis, feeling nako nanimaho na ko ug kagwang, hehehe! Unya basin pod ug kana ganing magbilin ug business notice ang nanuktok. Mao nga wala nako gibali-bali, maayo gani kusog kaayo ang volume sa TV kay while nanghugas ko ug plato sa kusina naminaw pod ko sa Maria la del Barrio sa TFC.

Nanuktok na pod ug utro, kaduha na, so niadto ko sa among kwarto ug akong gisilib. Pirmiro akong nakita kamot sa babaye nga naay bitbit nga regalo. Akong gitag-an nga si Brenda. Akong giklaro gyud ug silib, si Brenda gyud diay! Nagdali2x ko ug ilis! Pero pagkahuman wala jud ko nilihok! Ug wala gyud nako siya abrihi hangtud nibalik na lang siya sa iyang sakyanan ug nagdrive.

Ngil-ad kaayo ko no? Giabot man gyud ko ug kaulaw uy! Gusto ko mocall sa iyang celphone pero nadelete man tanan numbers sa akong cp tung gipalitan ko sa akong bana ug bag-o nga unit unya kini laging natagaw na ta, nadelete ang tanan info nga wala nako gituyo. Pero sa tinuod lang naay home phone number akong bana kung tuyuon lang gyud nako ug tawag niya. Pero giabot na ko ug kaulaw kay haskang dugaya na man tong akong promise. Mao gyud na ang nakabaho nako ug tik-tik matud pa, hehehe, kanang magpaundayon na lang pod sa gibati ba.

Si Brenda ang pinakauna nga akong na-amiga nga puti diri sa US. Ang iyang bana ug akong bana kauban sa work tung-una mao nagkaila mi. Siya ang naglibot sa ako sa Winnemucca. Gidala ko niya sa Museum diri, gisuroy sa mga butik, sa klase-klase nga simbahan (kay nangita man ko ug church nga akong maangayan aron didto na magsimbahan), unya gakuyog pod mi gawalking, etc. Siya pa man diay gani ang nikuyog sa ako sa DMV tong pagtake nako ug written test sa driving. Basta daghan kaayo na siyay natabang sa ako.Thoughtful kaayo si Brenda. Super. Walay makalupig. Pati sa akong mga anak thoughtful kaayo siya.

Mga unom na siguro ka bulan nga wala na mi nagkita, hala tunga man gyud diay sa tuig! Tung nagwork pa ko, iya ko giimbitar nga magbreakfast mi duha kay aron makatsika2x pod unya ingon ko niya nga tawagan ra nako siya ig-day off nako (Sige2x na gud namo na ginabuhat nga magbreakfast mi duha para i-update ang usag-usa.) Pila ka day off nako ang nilabay, ni-quit na lang ko sa akong work, naka adto na lang ko ug Pilipinas, nakabalik diri sa US ug hapit na lang mahuman ang tuig wala gyud ako nitawag niya. Unya kaduha na ko kabeses nga nagluto ug pagkaon para ihatud nako sa ilahang balay kay aron pambawi ba pero abuton ko ug kaulaw.

Pagtawag ni Ricardo sa ako, nireport gyud dayon ko nga niari si Brenda unya wala nako abrihi, iyang tubag, "My God Mahal, you're so mean!"

Mean gyud. Ngil-ad. Way puangod. Way batasan. Way kasing-kasing.

Karon nakonsensya gyud kaayo ko. Morag di ko makatulog ani dah! Brenda sorry gyud kaayo!

Haay.


Mangatawa Ta!

 
Imbis kay daghan koy gihuna-huna, medyo nawala kadali pagkabasa nako ani nga joke sa Facebook page ni Elvina, akong schoolmate sa High School. Akong giblog kay aron dili nako ni malimtan nga joke, hehehe, grabe baya nakong katawa ani, mora ko ug kyamoy kay ako ra man isa diri sa balay karon.

(Wala ko kabalo unsay title ani)
Anak: Pa, buros ko.
Papa: A, ok. Katulog na dha.
Anak: Dili lugar ka masuko nako?! Dili ko nimo sagpaon?! Unsa ka klase nga amahan?Wala kay pakialam sa imo anak?
Papa: Animal! Pagpuyo diha Berto ha! Kanang imong pagkabayot gidawat na nako, pero kanang pagburos-buros nimo, sobra na!
 
 

Sunday, December 11, 2011

Pasko Diri sa Amerika (Winnemucca)



Ika-lima na nako nga tuig ngari sa US ug morag duha lang ka beses nga nagdecorate ko sa balay. Tung niaging duha ka tuig ug karon nga tuig wala koy decoration. Morag wala lang. Makamingaw man gud ug samot. Dili lang pod kay ako ra ang walay decoration, ubay2x pod sa akong mga silingan ngari ang wala.

Ang pasko man gud diri lahi ra kaayo sa ato. Naa hinuon mga decorations sa mga tindahan ug mga balay2x pod pero ingon ana lang, naa gud poy party2x pero lahi ra gyud sa ato kay naa gyuy spirit of Christmas nga mafeel gyud nimo. Kana bang feeling nga "Christmas is in the air" na gyud, ingon ana gani nga feeling? Wala na diri.

Mao ni ang nakadeperensiya ngari (based sa akong experience ug obserbasyon) : walay carolling, dili uso ang handa sa tungang-gabii, sa mga Katoliko walay Simbang-gabi, dili tanan offices/company magpaparty, dili tanan naay exchanging gips, ug labaw sa tanan, walay christmas bonus nga madawat gikan sa employer.

Walay mangarol diri, mao na ang isa sa mga dislikes nako diri. Di ba mao pod nay nakanindot nga naay mangarol sa ato bisag usahay mag-ampo ta nga unta dili daghan ang mangarol kay mahutdan ta ug diyoy hehehe, pero kung wala poy mangarol sa ato makaingon ta nga basin dili sila ganahan sa ato kay kuripot ta mohatag :) Unya usahay magreklamo pod ta kay naay magbalik2x pod labina ang mga bata, hehehe!

Isa ka gabii, while padulong mi matulog sa akong bana nangutana ko niya, "Mahal, how come there ain't no people going house to house to carol here?" Iyang tubag, "Well, for one thing, it's because it's very cold outside." Morag nakapoint pod siya kay tugnaw gyud hinuon kaayo. Pero ingon ko, "Well, why don't they keep themselves warm? Like wearing thick clothes, winter boots, scarf, and gloves, etc?" Tubag niya, "Actually, Americans are becoming more private these days, they don't come out as they used to. They prefer to stay home with the family only. When I was a kid, I remember there was carolling back then." Sa akong huna-huna, "Ngeeeh, panahon pa man to ni Mampor."

Walay uso ang maghanda sa Christmas eve ngari kay busy ang mga pipol sa work. Sa kalisod sa panahon karon, ubay2x pod ang mga pipol nga doble ang trabaho so wala nay panahon sa mga hikay2x. So kasagaran molabay lang ang pasko nga morag wala lang. Morag ordinaryo lang nga adlaw. Unya kung off man gani ang asawa sa work, ang bana kay dili man, mao useless lang kaayo kung maghago ka unya ikaw ra isa or kaha kamo lang duha sa imong anak, maayo pa matulog na lang.

Naa pod exchanging gips kunuhay (kadtong nagwork pa ko) unya nagkita-kita mi sa isa sa mga restaurants ngari nag-order ug foods, take note KKB mi ingon sa among Supervisor. Pero niabot among big boss, nistay ug mga pipila ka minuto, wala man gani niingkod. Pagbayad namo ingon sa cashier gibayran na daw. Mao na to. Walay party. Unya nag-ask ko sa uban department, KKB gyud daw sila, wala na lang ko ni tell nga kami nalibre ni bossing.

Nagpaparty ang employer sa akong bana (every year gyud nuon) Didto pod mi pero duha ra mi Pinays didto sa party, pirti ka boring. Akong bana dili moinom ug dili mosayaw. Nisamot ka boring, hehehe!

Ug walay Christmas bonus diri intawon. Ambot lang sa uban nga States ha, basta diri wala koy nadungog nga nakadawat ug bonus tungod kay pasko. Dili pareho diha sa ato nga manghearing2x dayon kung pila ang madawat nga extra bonus unya magplano2x na dayon kung unsaun ang kwarta, ibayad ba kaha sa utang, ipalit ug levi's nga pantalon o kaha sapatos, ang uban ipalit ug regalo para sa mga mahal sa kinabuhi ug para sa mga inanak, ang uban i-deposito sa bangko, etc.

Karong 24 ug 25, day off sa akong bana pero dili mi maghanda kay mag-unsa man nga kami ra man duha, isa pa, lahi2x ang food nga gusto namo kaunon. Ako basta naa lay rice okay na, ako nay bahala sa sud-an. Unya siya pod lahi pod iyahang pagkaon, magluto ra pod siya ug iyaha apilan pod ko niya unya kay di man ko ganahan sa iyang pagkaon. Wala pa gyud mi nagplano kung mag-unsa mi ana pero basin mag- eat out na lang siguro mi ana. Aw basta mag-uban lang mi, payts na, hehe! Pagkahuman, mag online dayon kay aron machat nako ang akong mga anak. Lipay na ko ana :)

Lahi ra kaayo ang atong pasko diha. Siguro dili lang gyud nako ibaylo ang kabibo sa atong pasko diha. Aw dili lang kay siguro, sigurado gyud. Wala gyuy kapareho ang pasko sa Pilipinas. Mao nay giingon nga diri sa gawas sa nasud, kumpleto ang pang noche buena ug ang pangregalo pero dili kumpleto ang Pasko kay dili wala man ang pamilya.

Salamat sa paghapit.

Maayong Pasko!